નવી દિલ્હીના ભારત મંડપમમાં આજથી શરૂ થયેલા આ મહત્વપૂર્ણ સંમેલનમાં ભાગ લેવા માટે રશિયાના રાષ્ટ્રપતિ વ્લાદિમીર પુતિન તેમના સત્તાવાર કાફલા સાથે ભારત પહોંચી ગયા છે. બીજી તરફ ચીનના રાષ્ટ્રપતિ શી જિનપિંગ આજે ભારત પહોંચવાના છે. બંને નેતાઓની મુલાકાતની સાથે તેમની સત્તાવાર કારોએ પણ સૌનું ધ્યાન ખેંચ્યું છે.
પુતિન માટે રશિયાની ઓરસ સેનેટ L-700 અને જિનપિંગ માટે ચીનની હોંગકી N-701 જેવી અત્યંત સુરક્ષિત બખ્તરબંધ કારનો ઉપયોગ કરવામાં આવે છે. આ કારોને રાષ્ટ્રપ્રમુખોની સુરક્ષાને ધ્યાનમાં રાખીને ખાસ રીતે તૈયાર કરવામાં આવી છે.
પુતિનની ઓરસ સેનેટની કિંમત આશરે 2.5 કરોડ રૂપિયા
રશિયાના રાષ્ટ્રપતિ વ્લાદિમીર પુતિનની સત્તાવાર કાર ઓરસ સેનેટ L-700 એક બખ્તરબંધ લિમોઝિન છે. તેને ઘણીવાર ‘પહિયાં પર ચાલતો કિલ્લો’ અને ‘રશિયન રોલ્સ-રોયસ’ તરીકે ઓળખવામાં આવે છે. આ કારને ‘કોર્ટેસ’ પ્રોજેક્ટ હેઠળ મોસ્કોના સેન્ટ્રલ સાયન્ટિફિક રિસર્ચ ઓટોમોબાઇલ એન્ડ ઓટોમોટિવ એન્જિન ઇન્સ્ટિટ્યૂટ (NAMI) દ્વારા વિકસાવવામાં આવી છે.
વર્ષ 2018માં ઓરસ સેનેટે પુતિનની અગાઉની મર્સિડીઝ-બેન્ઝ S-600 ગાર્ડ પુુલમેનનું સ્થાન લીધું હતું. કારની લંબાઈ લગભગ 7 મીટર અને વજન આશરે 7 ટન હોવાનું જણાવાય છે. તેમાં 9-સ્પીડ ઓટોમેટિક ટ્રાન્સમિશન અને ઓલ-વ્હીલ ડ્રાઇવ છે. તેની મહત્તમ ઝડપ લગભગ 160 કિલોમીટર પ્રતિ કલાક છે.
https://twitter.com/adityapratapsri/status/2098413662205546978
આ કારમાં 4.4 લિટર ટ્વિન-ટર્બો V8 હાઇબ્રિડ એન્જિન છે, જે આશરે 598 હોર્સપાવર અને 880 એનએમ ટોર્ક ઉત્પન્ન કરે છે. તેની બોડી અને બારીઓને બુલેટથી સુરક્ષિત રાખવા માટે ખાસ બખ્તર અને જાડા બુલેટપ્રૂફ કાચનો ઉપયોગ કરવામાં આવ્યો છે. રન-ફ્લેટ ટાયર, મજબૂત ઇંધણ ટાંકી અને અંડરબોડી સુરક્ષા પણ તેની ખાસિયતોમાં સામેલ છે.
કારમાં ઓક્સિજન અને ફિલ્ટરેશન સિસ્ટમ તથા આગ સામે રક્ષણ માટેની વ્યવસ્થા પણ હોવાનું જણાવાય છે. પાછળના ભાગમાં આરામદાયક બેઠકો, ડિજિટલ સ્ક્રીન, વર્ક ટેબલ અને ફ્રિજ જેવી સુવિધાઓ આપવામાં આવી છે. તેની કિંમત આશરે 18 મિલિયન રુબલ એટલે કે લગભગ 2.5 કરોડ રૂપિયા હોવાનું જણાવાય છે.
જિનપિંગની હોંગકી N-701ની કિંમત આશરે 7 કરોડ રૂપિયા
ચીનના રાષ્ટ્રપતિ શી જિનપિંગની સત્તાવાર કાર હોંગકી N-701 પણ ખાસ બખ્તરબંધ લિમોઝિન છે. ચીની ભાષામાં ‘હોંગકી’નો અર્થ ‘લાલ ઝંડો’ થાય છે. આ કાર ચીનની સરકારી કંપની ફર્સ્ટ ઓટોમોટિવ વર્ક્સ (FAW) દ્વારા બનાવવામાં આવી છે.
આ કારની લંબાઈ આશરે 5.5 મીટર અને વજન લગભગ 3 ટન છે. તેમાં ઓલ-વ્હીલ ડ્રાઇવ સિસ્ટમ અને શક્તિશાળી એન્જિન આપવામાં આવ્યું છે. કારમાં બુલેટપ્રૂફ વ્હીલ્સ અને રન-ફ્લેટ ટાયરનો ઉપયોગ કરવામાં આવ્યો છે.
હોંગકી N-701ની બોડીમાં ભારે સુરક્ષા માટે ખાસ બખ્તરનો ઉપયોગ કરવામાં આવ્યો છે. બુલેટપ્રૂફ કાચ ઉપરાંત રાસાયણિક અથવા જૈવિક હુમલાની સ્થિતિમાં સુરક્ષા આપવા માટે સ્વતંત્ર હવા અને જીવન-સહાય પ્રણાલી પણ હોવાનો દાવો કરવામાં આવે છે. કારમાં લક્ઝરી લેધર સીટ, લાકડા અને જેડની કારીગરી, મસાજ સીટ અને એલઇડી સ્ક્રીન જેવી સુવિધાઓ છે. તેની કિંમત આશરે 5 મિલિયન યુઆન એટલે કે લગભગ 7 કરોડ રૂપિયા હોવાનું જણાવાય છે.
આ રીતે પુતિન અને જિનપિંગની સત્તાવાર કારો માત્ર લક્ઝરી માટે નહીં, પરંતુ રાષ્ટ્રપ્રમુખોની સુરક્ષાને ધ્યાનમાં રાખીને તૈયાર કરવામાં આવેલી અત્યંત સુરક્ષિત કારો તરીકે ખાસ મહત્વ ધરાવે છે.
આ પણ વાંચો: Brics Summit: મિત્રની જેમ મતભેદોને ભૂલીને, જિનપિંગ-મોદી મુલાકાત પહેલા ચીને આપ્યુ નિવેદન
