બાંગ્લાદેશના દક્ષિણ-પૂર્વ હિસ્સામાં કુદરતે કહેર વર્તાવ્યો છે. સતત પડી રહેલા મુસળધાર વરસાદને કારણે સર્જાયેલી પૂરની સ્થિતિ અને ભયાનક ભૂસ્ખલન (જમીન ધસી પડવી)ના કારણે અત્યાર સુધીમાં ઓછામાં ઓછા 54 લોકોના મોત નીપજ્યા છે. સત્તાવાર અહેવાલો અનુસાર, આ કુદરતી આફતથી સૌથી વધુ પ્રભાવિત દરિયાકાંઠાનો જિલ્લો કોક્સ બજાર (Cox's Bazar) થયો છે, જ્યાં અવિરત વરસાદે સામાન્ય જનજીવનને સંપૂર્ણપણે ખોરવી નાખ્યું છે.
રોહિંગ્યા શરણાર્થી શિબિરોમાં માટી ધસી પડી
કોક્સ બજારમાં આવેલા વિશ્વના સૌથી મોટા રોહિંગ્યા શરણાર્થી કેમ્પમાં સ્થિતિ અત્યંત ગંભીર બની ગઈ છે. પહાડી વિસ્તારોમાં સતત વરસાદને કારણે જમીન ધસી પડવાથી શરણાર્થીઓ માટેના અસ્થાયી આશ્રયસ્થાનો કાટમાળમાં ફેરવાઈ ગયા છે. આ માટી ધસી પડવાની ઘટનાઓમાં બાળકો સહિત અનેક લોકોના દટાઈ જવાથી મોત થયા છે. સ્થાનિક ડિઝાસ્ટર મેનેજમેન્ટ મંત્રાલયના જણાવ્યા અનુસાર, કોક્સ બજારમાં એકલા 31 લોકોના મોત થયા છે, જેમાં 13 રોહિંગ્યા શરણાર્થીઓનો સમાવેશ થાય છે. આ સિવાય ચિત્તાગોંગ (ચટગાંવ)માં 13 અને બંદરબનમાં 6 લોકોએ જીવ ગુમાવ્યા છે.
ઘરોની છત સુધી પહોંચ્યા પૂરના પાણી
બાંગ્લાદેશના પૂર પ્રભાવિત વિસ્તારોમાં હાલ દયનીય દ્રશ્યો જોવા મળી રહ્યા છે. અનેક નીચાણવાળા ગામોમાં હજુ પણ કમર સુધીના પાણી ભરાયેલા છે, જ્યારે કેટલાક વિસ્તારોમાં પૂરનું સ્તર એટલું વધી ગયું છે કે લોકોના ટીનના પતરાવાળા ઘરોની છત પણ પાણીમાં ડૂબી ગઈ છે. પૂરના કારણે પ્રભાવિત સાત જિલ્લાઓમાં આશરે 1.55 લાખથી વધુ પરિવારો સંપૂર્ણપણે પાણીથી ઘેરાયેલા છે. આપત્તિ વ્યવસ્થાપન મંત્રાલયે પુષ્ટિ કરી છે કે સમગ્ર દક્ષિણ-પૂર્વીય વિસ્તારમાં 10 લાખથી વધુ લોકો વિવિધ સ્થળોએ ફસાયેલા છે અને મદદની રાહ જોઈ રહ્યા છે.
મોટા પાયે બચાવ કાર્ય શરૂ
ગંભીર પરિસ્થિતિને જોતા બાંગ્લાદેશ સરકાર અને સ્થાનિક વહીવટીતંત્ર દ્વારા યુદ્ધના ધોરણે રાહત અને બચાવ કામગીરી શરૂ કરવામાં આવી છે. પ્રભાવિત જિલ્લાઓમાં સ્થળાંતરિત લોકોને આશ્રય આપવા માટે 1,040થી વધુ ઇમરજન્સી શેલ્ટર હોમ (આશ્રય કેન્દ્રો) ખોલવામાં આવ્યા છે, જ્યાં 38,000થી વધુ લોકોએ આશરો લીધો છે. સરકારે અસરગ્રસ્ત વિસ્તારોમાં તાત્કાલિક ધોરણે હજારો ટન ચોખા અને કરોડો ટકાની આર્થિક સહાય સાથે સૂકો ખોરાક અને પીવાના પાણીની વ્યવસ્થા પહોંચાડવા માટે ટીમો રવાના કરી છે, પરંતુ પાણીનો પ્રવાહ વધુ હોવાથી બચાવકર્તાઓને અંતરિયાળ વિસ્તારો સુધી પહોંચવામાં ભારે મુશ્કેલીઓનો સામનો કરવો પડી રહ્યો છે.
આ પણ વાંચો: USના સૌથી ઘાતક બોમ્બ પણ જ્યાં ફેલ છે, તેવા ઈરાનના પરમાણુ બંકરનો નાશ કરવાનો ટ્રમ્પનો પ્લાન
