અમેરિકાના ન્યૂ યોર્ક સ્થિત Columbia Universityમાં અભ્યાસ કરતી વિદ્યાર્થીની એલી અઘાયેવાની ફેડરલ ઇમિગ્રેશન એજન્ટો દ્વારા ધરપકડ કરવામાં આવતા ભારે વિવાદ સર્જાયો હતો. 26 ફેબ્રુઆરી, ગુરુવારે સવારે થયેલી આ ધરપકડ બાદ યુનિવર્સિટી કેમ્પસમાં વિદ્યાર્થીઓ અને માનવ અધિકાર સંગઠનો દ્વારા વિરોધ પ્રદર્શનો શરૂ થયા.
ફેડરલ ઇમિગ્રેશન એજન્ટો
વિદ્યાર્થીઓનો આરોપ હતો કે ફેડરલ ઇમિગ્રેશન એજન્ટોએ પોતાની ઓળખ છુપાવી પોલીસ અધિકારીઓનો ઢોંગ કર્યો અને “ગુમ થયેલા બાળકની શોધ”ના બહાને કેમ્પસમાં પ્રવેશ કર્યો. આ રીતે યુનિવર્સિટી પરિસરમાં પ્રવેશીને વિદ્યાર્થીનીની ધરપકડ કરવી ગેરકાયદેસર અને બંધારણીય અધિકારોનું ઉલ્લંઘન હોવાનું કહેવામાં આવ્યું.
કોણ છે એલી અઘાયેવા?
એલી અઘાયેવા કોલંબિયા યુનિવર્સિટીમાં અભ્યાસ કરતી આંતરરાષ્ટ્રીય વિદ્યાર્થીની છે. ધરપકડ સમયે તેણે ઇન્સ્ટાગ્રામ પર પોસ્ટ કરીને લખ્યું હતું, “DHS એ મને ગેરકાયદેસર રીતે ધરપકડ કરી છે. કૃપા કરીને મદદ કરો.” પોસ્ટ સાથેના ફોટામાં તે કારની પાછળની સીટ પર બેઠેલી જોવા મળતી હતી. આ પોસ્ટ વાયરલ થતાં મામલો રાષ્ટ્રીય ચર્ચાનો વિષય બની ગયો.
મમદાનીનો હસ્તક્ષેપ અને ટ્રમ્પનો આદેશ
ન્યૂ યોર્ક શહેરના મેયર Zohran Mamdaniએ આ મામલે તાત્કાલિક હસ્તક્ષેપ કર્યો. તેમણે સોશિયલ મીડિયા પર જણાવ્યું કે તેમણે રાષ્ટ્રપતિ Donald Trumpસાથેની એક બેઠક દરમિયાન વિદ્યાર્થીનીની ધરપકડ અંગે ગંભીર ચિંતા વ્યક્ત કરી હતી. મેયર મમદાનીના કહેવા મુજબ, ટ્રમ્પે સમગ્ર મામલો સાંભળ્યા બાદ એલી અઘાયેવાને તરત મુક્ત કરવાનો આદેશ આપ્યો. મમદાનીની પોસ્ટના થોડા સમય પછી જ એલી અઘાયેવાએ ઇન્સ્ટાગ્રામ પર પોતાની મુક્તિની પુષ્ટિ કરી. તેણીએ લખ્યું, “હું સુરક્ષિત અને સ્વસ્થ છું, પરંતુ આ અનુભવ મને માનસિક રીતે હચમચાવી ગયો છે.”
DHSનું સ્પષ્ટીકરણ
Department of Homeland Securityના પ્રવક્તાએ જણાવ્યું હતું કે એલી અઘાયેવાનો વિદ્યાર્થી વિઝા 2016માં વર્ગોમાં નિયમિત હાજરી ન આપવા કારણે રદ કરવામાં આવ્યો હતો. જોકે, કોલંબિયા યુનિવર્સિટીએ તેના વિઝા સ્ટેટસ અથવા તે કેટલા સમયથી કેમ્પસમાં હતી તે અંગે સ્પષ્ટ જવાબ આપ્યો ન હતો. એલી અઘાયેવાના વકીલોએ જણાવ્યું કે તે 2016ની આસપાસ વિઝા પર અમેરિકા આવી હતી, પરંતુ હાલ તેના ઇમિગ્રેશન સ્ટેટસ વિશે વધુ વિગતો આપવાનો ઇનકાર કર્યો.
અન્ય વિદ્યાર્થીઓ માટે પણ અપીલ
મેયર મમદાનીએ માત્ર આ કેસ જ નહીં પરંતુ ઇઝરાયલ વિરુદ્ધના વિરોધ પ્રદર્શનોમાં ભાગ લેવા બદલ દેશનિકાલનો સામનો કરી રહેલા અન્ય વર્તમાન અને ભૂતપૂર્વ વિદ્યાર્થીઓ સામેના કેસો પણ પાછા ખેંચવાની અપીલ કરી છે. આ સમગ્ર ઘટનાએ અમેરિકામાં ઇમિગ્રેશન કાયદા, વિદ્યાર્થીઓના અધિકારો અને કેમ્પસની સ્વતંત્રતા અંગે ફરી એકવાર ચર્ચા શરૂ કરી છે. એલી અઘાયેવાની મુક્તિ ભલે મળી ગઈ હોય, પરંતુ આ મામલો હજુ પણ અનેક સવાલો ઉભા કરે છે.
આ પણ વાંચો : US Supreme Court : સુપ્રીમ કોર્ટના ચુકાદાથી ભારત–અમેરિકા વેપાર સોદો ખોરવાયો!
