પૂર્વી આફ્રિકન દેશ ડેમોક્રેટિક રિપબ્લિક ઓફ કોંગોના બુકાવુ શહેરમાં એક અત્યંત હૃદયદ્રાવક અને દુર્ભાગ્યપૂર્ણ ઘટના બની છે, જ્યાં એક ઘરમાંથી ફેલાયેલી ભીષણ આગે નજીકની બે શાળાઓને પોતાની ચપેટમાં લઈ લીધી હતી. આ ભયાનક અગ્નિકાંડમાં ઓછામાં ઓછા 26 વિદ્યાર્થીઓનાં કરુણ મોત નીપજ્યાં છે, જ્યારે અનેક વિદ્યાર્થીઓ ગંભીર રીતે ઘાયલ થયા છે. દક્ષિણ કિવુ પ્રાંતીય સરકારના જણાવ્યા અનુસાર, મૃતકોમાં 19 છોકરીઓ અને 7 છોકરાઓનો સમાવેશ થાય છે. અધિકારીઓએ આશંકા વ્યક્ત કરી છે કે આગામી સમયમાં મૃત્યુઆંક વધુ વધી શકે છે.
ઘરમાંથી ફેલાયેલી આગ બે શાળાઓ સુધી પહોંચી
મૂળ રૂપે આગ બુકાવુ શહેરના એક ગીચ વસ્તીવાળા વિસ્તારમાં સ્થિત એક ઘરમાં ફેલાઈ હતી. આ વિસ્તારમાં મોટાભાગના મકાનો લાકડાના બનેલા હોવાને કારણે આગ ખૂબ જ ઝડપથી આસપાસના વિસ્તારમાં ફેલાઈ ગઈ અને તેણે ફુરાહા માધ્યમિક શાળા તેમજ નજીકની ઉજામા પ્રાથમિક શાળાને પોતાની લપેટમાં લીધી. ઘટના સમયે શાળાઓની અંદર મોટી સંખ્યામાં વિદ્યાર્થીઓ અભ્યાસ કરી રહ્યા હતા.
https://twitter.com/TeluguStride/status/2098258042131460308
નાસભાગ અને સાંકડા રસ્તાઓને કારણે સર્જાઈ મોટી હોનારત
જ્યારે આગ ફાટી નીકળી ત્યારે શાળાઓમાં ભારે અફરાતફરી અને નાસભાગ મચી ગઈ હતી. સ્થાનિક પ્રશાસનના જણાવ્યા અનુસાર, શાળાઓના બહાર નીકળવાના રસ્તાઓ ખૂબ જ સાંકડા હોવાને કારણે બાળકો અંદર જ ફસાઈ ગયા હતા. જીવ બચાવવા માટે કેટલાક વિદ્યાર્થીઓ બારીઓમાંથી કૂદી પડ્યા હતા તો કેટલાક મુખ્ય દરવાજા તરફ દોડ્યા હતા. એકસાથે બહાર નીકળવાની દોડધામમાં ઘણા બાળકો ભીડ નીચે કચડાઈ ગયા, જ્યારે કેટલાક વિદ્યાર્થીઓ ધુમાડાના કારણે ગૂંગળામણથી બેભાન થઈને મૃત્યુ પામ્યા.
ઘાયલોની સારવાર અને રાહત-બચાવ કામગીરી
ઘટનાની જાણ થતા જ રાહત અને બચાવ કામગીરી શરૂ કરવામાં આવી હતી. પીડિત વિદ્યાર્થીઓને તાત્કાલિક ધોરણે નજીકના ન્યામુલાગીરા BDOM આરોગ્ય કેન્દ્રમાં ખસેડવામાં આવ્યા હતા. તબીબી સ્ટાફના જણાવ્યા અનુસાર, ઘાયલોની સંખ્યા એટલી વધારે હતી કે દર્દીઓની યોગ્ય સંભાળ રાખવામાં ભારે મુશ્કેલી પડી રહી હતી. હાલ અનેક ઘાયલ વિદ્યાર્થીઓની સ્થાનિક હોસ્પિટલોમાં સારવાર ચાલી રહી છે.
દુર્ઘટના પાછળના ચોક્કસ કારણોની કરાશે તપાસ
આ દુર્ઘટનાએ પૂર્વી કોંગોની ગંભીર પરિસ્થિતિ પર પણ પ્રકાશ પાડ્યો છે. આ પ્રદેશ પહેલેથી જ સશસ્ત્ર સંઘર્ષો, બળવાખોર જૂથોના કબજા અને ખનિજ સંસાધનો માટેની આંતરિક લડાઈનો સામનો કરી રહ્યો છે. આ ઉપરાંત, આ વિસ્તાર ઇતિહાસના સૌથી ખરાબ ઇબોલા રોગચાળા સામે પણ ઝઝૂમી રહ્યો છે, જેના કારણે સ્વાસ્થ્ય સેવાઓ પહેલેથી જ ભારે દબાણ હેઠળ છે. શાળાની આ ભયાનક આગે સ્થાનિક પ્રશાસન અને પીડિત પરિવારજનોની મુશ્કેલીઓમાં અનેકગણો વધારો કરી દીધો છે. વહીવટી તંત્ર દ્વારા આ દુર્ઘટના પાછળના ચોક્કસ કારણોની ઝીણવટભરી તપાસ હાથ ધરવામાં આવી રહી છે.
આ પણ વાંચોઃ BRICS Summit 2026: સમિટને કારણે દિલ્હીની અનેક ટ્રેનો કરાઇ રદ્દ તો કેટલીક ટ્રેનોના બદલાયા રૂટ, જોઇ લો લિસ્ટ
