અમેરિકન મીડિયાના એક સનસનાટીભર્યા અહેવાલમાં દાવો કરવામાં આવ્યો છે કે ફ્રાન્સ અને યુરોપમાં થયેલા વિરોધ પ્રદર્શનો તથા ભારતમાં થયેલા આંદોલનો વચ્ચે આંતરરાષ્ટ્રીય સ્તરે જોડાણ હોઈ શકે છે. આ રિપોર્ટ અનુસાર, વિશ્વના 9 દેશોમાં ફેલાયેલા 101 જેટલા સંગઠનો સોશિયલ મીડિયા અને અન્ય માધ્યમો દ્વારા વિરોધ પ્રદર્શનોનું આયોજન, સંકલન અને પ્રોત્સાહન આપવામાં સામેલ છે. આ નેટવર્કમાં 'ઇન્ડિયા એલાયન્સ પેરિસ' (IAP) નામના ફ્રાન્સ સ્થિત સંગઠનનું નામ મુખ્યત્વે ઉભરીને સામે આવ્યું છે.
શું છે 'ઇન્ડિયા એલાયન્સ પેરિસ' અને વૈશ્વિક જોડાણ?
'ઇન્ડિયા એલાયન્સ પેરિસ' (IAP) ફ્રાન્સમાં સક્રિય એક સંગઠન છે, જે ફ્રાન્સ અને ભારતમાં થતા વિરોધ પ્રદર્શનોને એકબીજા સાથે જોડવાનું કામ કરે છે. અહેવાલ મુજબ, આ સંગઠને ન્યૂ યોર્કના મેનહટન સ્થિત 'ધ પીપલ્સ ફોરમ' સાથે ભાગીદારી કરીને ભારતમાં થયેલા વિવિધ આંદોલનોને આંતરરાષ્ટ્રીય મંચ પર હાઇલાઇટ કર્યા હતા.
અનેક સંગઠનોના નામનો ઉલ્લેખ
આ ઉપરાંત, રિપોર્ટમાં 'પ્રોગ્રેસિવ ઇન્ટરનેશનલ', 'કોડપિંક' અને 'બ્રેકથ્રુ ન્યૂઝ' જેવા સંગઠનોનો પણ ઉલ્લેખ છે. 16 ઓક્ટોબરના રોજ પ્રોગ્રેસિવ ઇન્ટરનેશનલે ફ્રાન્સ, સ્પેન, ભારત અને અલ્બેનિયાના વિરોધ પ્રદર્શનોને એકજૂથ કરીને તેમને એક મોટા રાજકીય બળમાં રૂપાંતરિત કરવા અપીલ કરી હતી. અમેરિકી ઉદ્યોગપતિ નેવિલ રોય સિંઘમ સાથે સંકળાયેલા મીડિયા જૂથો દ્વારા પણ આવા આંદોલનોનો પ્રચાર કરવામાં આવ્યો હોવાનું કહેવાય છે.
આગામી યોજનાઓ અને પુરાવાનો અભાવ
અહેવાલ અનુસાર, ફ્રાન્સમાં વિરોધ પ્રદર્શનકારો 24 ઓક્ટોબરે 'એક્ટ II' અને ૩૧ ઓક્ટોબરે 'એક્ટ III' હેઠળ મોટા પાયે શેરીઓમાં ઉતરવાની તૈયારી કરી રહ્યા છે. આ સિવાય 20 નવેમ્બરે વૈશ્વિક સ્તરે 'આંતરરાષ્ટ્રીય યુવા હડતાળ'નું આયોજન છે, જેમાં મોંઘવારી, સરકારી કાપ અને લશ્કરી ખર્ચનો વિરોધ કરવામાં આવશે.
કોઈ નક્કર કે પ્રત્યક્ષ પુરાવો રજૂ કરવામાં આવ્યો નથી
જોકે, આ સમગ્ર અહેવાલમાં સૌથી મહત્વની બાબત એ છે કે વૈશ્વિક સંગઠનો અને વિરોધ પ્રદર્શનોના પ્રચાર વચ્ચે સંબંધો દર્શાવવામાં આવ્યા છે, પરંતુ વિદેશી ધરતી પરથી ભારતમાં પ્રદર્શનો ઉશ્કેરવા કે તેમને સીધા નિયંત્રિત કરવા અંગેનો કોઈ નક્કર કે પ્રત્યક્ષ પુરાવો રજૂ કરવામાં આવ્યો નથી.
ડિસ્ક્લેમરઃ આ લેખ માહિતીના આધારે લખવામાં આવ્યો છે. સંદેશ ન્યુઝ આની કોઇ પણ પ્રકારની પુષ્ટિ કરતી નથી.
આ પણ વાંચોઃ Hormuz ની સામુદ્રધુનીમાં કુવૈતી તેલ ટેન્કર પર જોરદાર મિસાઇલ હુમલો, જહાજ પર સવાર હતા 21 ભારતીયો
