મિડલ ઈસ્ટમાં કુવૈત અને UAE પર ઈરાનના સતત થઈ રહેલા હુમલા વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે મોટું નિવેદન આપ્યું છે. અમેરિકી અખબાર 'વોલ સ્ટ્રીટ જર્નલ' (WSJ) ના અહેવાલ મુજબ, રાષ્ટ્રપતિ ટ્રમ્પ હાલમાં ઈરાન સાથે કોઈ મોટા પાયાના યુદ્ધમાં ઉતરવા માંગતા નથી. જો કે, તેમણે ઈરાન માટે એક કડક 'રેડ લાઈન' નક્કી કરી દીધી છે કે જો ઈરાની હુમલામાં કોઈ પણ અમેરિકન સૈનિકનું મોત થશે, તો અમેરિકા સીઝફાયર તોડીને ઈરાન પર ભીષણ લશ્કરી કાર્યવાહી કરશે.
ટ્રમ્પની પત્રકારો સાથે વાતચીત
અમેરિકા અને ઈરાન વચ્ચે ગત 8 એપ્રિલે યુદ્ધવિરામ લાગુ થયો હતો, પરંતુ આ અઠવાડિયે કુવૈત ઇન્ટરનેશનલ એરપોર્ટ અને અમેરિકી સૈન્ય ઠેકાણાઓ પર ઈરાનના મિસાઈલ અને ડ્રોન હુમલા બાદ તણાવ ફરી ચરમસીમાએ પહોંચ્યો છે. વ્હાઇટ હાઉસમાં પત્રકારો સાથે વાતચીત કરતા ટ્રમ્પે જણાવ્યું હતું કે, મિડલ ઈસ્ટ જેવા વિસ્તારોમાં સીઝફાયરનો અર્થ સંપૂર્ણ શાંતિ નથી હોતો, ત્યાં નાના પાયે સંઘર્ષ ચાલતો રહે છે. હાલ સ્થિતિ નિયંત્રણમાં છે અને વાટાઘાટોના દ્વાર ખુલ્લા છે.
