યુએસના રાષ્ટ્રપતિ ડોનાલ્ડ ટ્રમ્પનું ન્યુ યોર્ક શહેરના ક્વીન્સ વિસ્તારમાં આવેલું ઐતિહાસિક બાળપણનું ઘર લાંબી પ્રતીક્ષા અને અનેક ચડાવ-ઉતાર બાદ આખરે વેચાઈ ગયું છે. આ મિલકત તાજેતરમાં જ ૧.૯૩ મિલિયન ડૉલર (અંદાજે ₹૧૬ કરોડથી વધુ) ની માતબર કિંમતમાં વેચાઈ છે, જેણે વૈશ્વિક સ્તરે રિયલ એસ્ટેટ બજારમાં ફરી એકવાર ચર્ચા જગાવી છે.
ઘરનો ઐતિહાસિક પૃષ્ઠભૂમિ અને કિંમતી યાદો
આ ટ્યુડર શૈલીનું ભવ્ય ઘર 1940 માં ડોનાલ્ડ ટ્રમ્પના દિવંગત પિતા ફ્રેડ ટ્રમ્પ દ્વારા બનાવવામાં આવ્યું હતું. ડોનાલ્ડ ટ્રમ્પ તેમના જીવનના શરૂઆતના ચાર વર્ષ આ જ ઘરમાં રહ્યા હતા. સમય જતાં આ ઘરની ઓળખ ટ્રમ્પના બાળપણના નિવાસસ્થાન તરીકે ખાસ બની ગઈ હતી, જેના કારણે તેનું ઐતિહાસિક મહત્વ ઘણું વધી ગયું છે.
https://twitter.com/MarioNawfal/status/2098954824616411616
જર્જરિત હાલત અને ભવ્ય નવીનીકરણ
એક સમયે આલીશાન રહેતું આ ઘર લાંબા સમય સુધી ખાલી રહેવાને કારણે અત્યંત દયનીય અને જર્જરિત સ્થિતિમાં પહોંચી ગયું હતું. ઘરમાં પાઇપ ફાટી જવાથી પાણી ટપકતું હતું. આખા મકાનમાં ફૂગ ફેલાઈ ગઈ હતી. રખડતી બિલાડીઓ અને પ્રાણીઓએ ત્યાં આશરો લઈ લીધો હતો.
જોકે, ગયા વર્ષે ડેવલપર ટોમી લિએ આ પાંચ બેડરૂમ અને ત્રણ બાથરૂમવાળું ઘર ૮,૩૫,૦૦૦ ડૉલરમાં ખરીદ્યું હતું. ટોમી લિએ આ ઐતિહાસિક મિલકતને નવજીવન આપવા માટે આઠ મહિના સુધી સખત મહેનત કરી અને આશરે ૫૦૦,૦૦૦ ડૉલર (લગભગ ₹૪.૭૮ કરોડ) નો તોતિંગ ખર્ચ કર્યો. નવીનીકરણ બાદ આ ઘરમાં અત્યાધુનિક સુવિધાઓ જેવી કે રસોઇયાનું ખાસ કિચન, હેરિંગબોન લાકડાનું ફ્લોરિંગ અને સ્પા જેવું આલીશાન બાથરૂમ તૈયાર કરવામાં આવ્યા છે. તાજેતરમાં જુલાઈ મહિનામાં આ આકર્ષક ઘર એક અજ્ઞાત ખરીદદારને વેચી દેવામાં આવ્યું છે.
મિલકતનો ઉથલપાથલ ભરેલો ઇતિહાસ
આ ઘરના વેચાણ અને ખરીદીનો ઇતિહાસ પણ કાફી રસપ્રદ રહ્યો છે. વર્ષ ૨૦૧૭માં, જ્યારે ડોનાલ્ડ ટ્રમ્પ પ્રથમવાર અમેરિકાના રાષ્ટ્રપતિ બન્યા, ત્યારે આ ઘર ૨.૧૪ મિલિયન ડૉલરમાં વેચાયું હતું. તે સમયે "ટ્રમ્પ બર્થ હોમ એલએલસી" નામના પ્લેટફોર્મે તેને એરબીએનબી (Airbnb) પર ભાડે પણ આપ્યું હતું, જ્યાં ટ્રમ્પના લાઈફ-સાઈઝ કટઆઉટ્સ અને તેમના પુસ્તકો પ્રદર્શિત કરવામાં આવ્યા હતા.
ત્યારબાદ ૨૦૧૯માં આ ઘરને ૨.૯ મિલિયન ડૉલરની ઊંચી કિંમતે બજારમાં મૂકવામાં આવ્યું હતું, પરંતુ યોગ્ય ખરીદદાર ન મળવાને કારણે તે લાંબો સમય વેચાયા વગર ખાલી રહ્યું અને ધીમે-ધીમે જર્જરિત બનતું ગયું. આખરે, ડેવલપરના આધુનિકીકરણના પ્રયાસો રંગ લાવ્યા અને આ ઐતિહાસિક ઘર આખરે યોગ્ય ગ્રાહકને વેચાઈ ગયું છે.
આ પણ વાંચોઃ Petrol Diesel Price Today: વૈશ્વિક બજારમાં ક્રૂડ ઓઇલ ઉછળ્યું, પેટ્રોલ ડીઝલના ભાવ વધશે? જાણો આજનો લેટેસ્ટ રેટ
