45 વર્ષ પહેલાં તત્કાલીન રાષ્ટ્રપતિ રોનાલ્ડ રીગન પર થયેલા હુમલા બાદ હવે રાષ્ટ્રપતિ ડોનાલ્ડ ટ્રમ્પની હાજરીમાં ફરી એકવાર ગોળીબાર થતા હિલ્ટન હોટલ ધ્રૂજી ઉઠી છે. વ્હાઇટ હાઉસ કોરેસ્પોન્ડન્ટ્સ ડિનર દરમિયાન બનેલી આ ઘટનાએ સુરક્ષા પર ગંભીર સવાલો ઉભા કર્યા છે અને ઇતિહાસની ભયાનક યાદો તાજી કરી દીધી છે.અમેરિકાની રાજધાની વોશિંગ્ટન સ્થિત વોશિંગ્ટન હિલ્ટન હોટલ ફરી એકવાર ચર્ચામાં છે. આ એ જ હોટલ છે જે અગાઉ પણ એક મોટા હુમલાની સાક્ષી રહી ચૂકી છે. વર્ષ 1981માં અહીં રાષ્ટ્રપતિ રોનાલ્ડ રીગન પર જીવલેણ હુમલો થયો હતો, જેણે આખા અમેરિકાને હચમચાવી દીધું હતું. હવે અંદાજે 45 વર્ષ બાદ ફરી આ જ હોટલમાં ગોળીઓનો અવાજ ગુંજ્યો છે, જ્યારે રાષ્ટ્રપતિ ડોનાલ્ડ ટ્રમ્પ એક મોટા કાર્યક્રમમાં હાજરી આપવા પહોંચ્યા હતા.
ભૂતકાળની એ ઘટના: 30 માર્ચ, 1981
તે દિવસે રાષ્ટ્રપતિ રોનાલ્ડ રીગન આ જ હોટલમાં એક કાર્યક્રમમાં સામેલ થયા હતા. જ્યારે તેઓ બહાર નીકળીને પોતાની ગાડી તરફ વધી રહ્યા હતા, ત્યારે જોન હિંકલે જુનિયર નામના વ્યક્તિએ તેમના પર ગોળી ચલાવી હતી. તેણે 22 કેલિબરની રિવોલ્વરનો ઉપયોગ કર્યો હતો.આ હુમલામાં રીગન ઉપરાંત સીક્રેટ સર્વિસ એજન્ટ ટિમોથી મેકકાર્થી, પોલીસ અધિકારી થોમસ ડેલાહાંટી અને પ્રેસ સેક્રેટરી જેમ્સ બ્રેડી પણ ઘાયલ થયા હતા. બ્રેડીની હાલત ગંભીર હતી અને તેઓ આજીવન અપંગ બની ગયા હતા. આ ઘટના બાદ રાષ્ટ્રપતિની સુરક્ષા વ્યવસ્થામાં મોટા ફેરફારો કરવામાં આવ્યા હતા.
