રોબોટ્સ હવે ફક્ત ફિલ્મો કે ફેક્ટરીઓ સુધી સીમિત નથી રહ્યા. ટેકનોલોજીની ઝડપ સાથે હવે એવા દિવસો દૂર નથી જ્યારે મશીનો માનવ જીવનનો એક ભાગ બની જશે. ટેસ્લાના CEO એલન મસ્ક તો આથી પણ આગળ વિચારે છે. તેમનું માનવું છે કે ભવિષ્યમાં રોબોટ્સ માનવો કરતાં પહેલાં અન્ય ગ્રહો પર વસાહત સ્થાપિત કરવામાં મદદ કરી શકે છે.
‘ઓપ્ટીમસ’ માટે એક વિઝન
એલન મસ્કે ટેસ્લાના હ્યુમનોઈડ રોબોટ ‘ઓપ્ટીમસ’ માટે એક વિઝન રજૂ કર્યું છે. મસ્કના મતે, ઓપ્ટીમસ ફક્ત ફેક્ટરી કે ઘરકામ માટેનો રોબોટ નહીં હોય, પરંતુ તે માનવ જાત માટે અવકાશમાં નવી દુનિયાનો માર્ગ તૈયાર કરી શકે છે. જોકે, તેમણે એ પણ સ્પષ્ટ કર્યું છે કે આ બધું તરત થવાનું નથી અને તેમાં હજુ ઘણા વર્ષો લાગી શકે છે.
માનવ જેવા દેખાતા રોબોટ
ઓપ્ટીમસને એક સામાન્ય હેતુવાળા, માનવ કદના અને માનવ જેવા આકાર ધરાવતા રોબોટ તરીકે વિકસાવવામાં આવી રહ્યો છે. તેનો મુખ્ય ઉદ્દેશ એવા કાર્યો સંભાળવાનો છે જે માનવો માટે ખતરનાક, કંટાળાજનક અથવા વારંવાર કરવાની જરૂરવાળા હોય. એલોન મસ્ક માને છે કે ભવિષ્યમાં આ રોબોટ સંપૂર્ણપણે સ્વચાલિત બની શકે છે અને લાંબા સમય સુધી માનવ સહાય વિના કામ કરી શકે છે.
એલન મસ્કની કલ્પના ખૂબ જ રસપ્રદ
અવકાશ મિશનના સંદર્ભમાં એલન મસ્કની કલ્પના ખૂબ જ રસપ્રદ છે. તેઓ માને છે કે માનવોને સીધા જ જોખમી પરિસ્થિતિઓમાં મોકલવાને બદલે, પહેલાં આવા રોબોટ્સને ચંદ્ર, મંગળ અથવા અન્ય ગ્રહો પર મોકલવામાં આવે. ત્યાં આ રોબોટ્સ ખરાબ વાતાવરણમાં કામ કરીને જરૂરી માળખું તૈયાર કરી શકે, ઘરો બનાવી શકે અને આવનાર માનવો માટે સલામત પરિસ્થિતિ ઊભી કરી શકે.
ઓપ્ટીમસને સ્વ-નિર્માણ રોબોટ
એલન મસ્કે ઓપ્ટીમસને સ્વ-નિર્માણ રોબોટ, એટલે કે વોન ન્યુમેન મશીનના વિચાર સાથે પણ જોડ્યો છે. આ એક સૈદ્ધાંતિક ખ્યાલ છે જેમાં મશીન સ્થાનિક સંસાધનોનો ઉપયોગ કરીને પોતાની જાતે જ પોતાની નકલો બનાવી શકે છે. મસ્કે સોશિયલ મીડિયા પ્લેટફોર્મ X પર લખ્યું હતું કે ઓપ્ટીમસ પહેલો એવો રોબોટ બની શકે છે જે કોઈ રહેવા યોગ્ય ગ્રહ પર પોતાના બળ પર સભ્યતાનો પાયો નાખી શકે.
ગ્રહ પર પહોંચીને ત્યાંના
આ વિચાર મુજબ, રોબોટ્સ કોઈ ગ્રહ પર પહોંચીને ત્યાંના ખનિજ સંસાધનોનો ઉપયોગ કરશે, માળખાં ઊભાં કરશે, પોતાનું સમારકામ કરશે અને ધીમે ધીમે માનવ હસ્તક્ષેપ વગર કામ કરવાની ક્ષમતા વિકસાવશે. મસ્ક માને છે કે આવી ટેકનોલોજી ભવિષ્યમાં અવકાશમાં માનવ વસાહતો માટે મજબૂત આધાર બની શકે છે.
ઓપ્ટીમસનો પ્રભાવ મોટો
પૃથ્વી પર પણ ઓપ્ટીમસનો પ્રભાવ મોટો હોઈ શકે છે. એલોન મસ્ક તેને “માનવ ઇતિહાસનું સૌથી મહાન ઉત્પાદન” ગણાવે છે. તેમનું માનવું છે કે જો આ રોબોટનો વ્યાપક ઉપયોગ થાય તો કામ કરવું વૈકલ્પિક બની શકે, ઉત્પાદન ખર્ચ ઘટી શકે અને ગરીબી જેવી સમસ્યાઓ દૂર કરવામાં મદદ મળી શકે.
https://twitter.com/rough__sea/status/2018446155420782610
ઓપ્ટીમસ હજુ વિકાસના પ્રારંભિક તબક્કામાં
જોકે હકીકત એ છે કે ઓપ્ટીમસ હજુ વિકાસના પ્રારંભિક તબક્કામાં છે. ટેસ્લા હાલમાં તેના સંતુલન, હાથની પકડ, દ્રષ્ટિ અને સ્વચાલિત નિર્ણય લેવાની ક્ષમતાને વધુ મજબૂત બનાવવા પર કામ કરી રહી છે. અન્ય ગ્રહો પર વસાહત સ્થાપિત કરવી અથવા સ્વ-નિર્માણ રોબોટ્સ બનાવવું હજી લાંબા સમયનું સ્વપ્ન છે. તેમ છતાં, ઓપ્ટીમસ ભવિષ્યની એક ઝલક જરૂર આપે છે. તે દર્શાવે છે કે એલોન મસ્ક પૃથ્વી અને અવકાશ બંનેના ભવિષ્યમાં રોબોટિક્સને કેન્દ્રસ્થાને રાખે છે. આવનાર સમયમાં રોબોટ્સ માનવ સંસ્કૃતિની દિશા બદલી નાખે, તે સંભાવના હવે કલ્પના નહીં પરંતુ શક્યતા બની રહી છે.
આ પણ વાંચો : Indian Special Forces : ભારતના 10 સૌથી ખતરનાક Special Forces જે ધ્રૂજાવે દુશ્મનોને, જાણો માહિતી
