સમગ્ર યુરોપ હાલમાં અભૂતપૂર્વ અને ભીષણ ગરમીની ઝપેટમાં આવી ગયું છે. જૂન મહિનાના અંતમાં જ ફ્રાન્સ, ઇટાલી, સ્પેન અને જર્મની સહિતના દેશોમાં પારો 40 ડિગ્રી સેલ્સિયસને પાર કરી જતાં હાહાકાર મચી ગયો છે. આ આકરા ઉનાળા અને હીટવેવના કારણે પ્રશાસન દ્વારા અનેક મોટા શહેરોમાં હાઇ-લેવલ 'રેડ એલર્ટ' જાહેર કરવામાં આવ્યું છે. ગરમીની સીધી અસર ટ્રાન્સપોર્ટ, રેલવે સેવાઓ અને પ્રવાસન ક્ષેત્ર પર પડી રહી છે, જેના કારણે હજારો પ્રવાસીઓ મુશ્કેલીમાં મુકાયા છે.
ઇટાલીના 15 શહેરોમાં રેડ એલર્ટ
ઇટાલીની સ્થિતિ સૌથી વધુ ચિંતાજનક છે. રાજધાની રોમ, મિલાન, ફ્લોરેન્સ અને બોલોગ્ના સહિત દેશના 15 મુખ્ય શહેરોમાં તાપમાન 40°C થી વધુ નોંધાયું છે. આરોગ્ય મંત્રાલયે લેવલ-3 એટલે કે કટોકટીની સ્થિતિનું રેડ એલર્ટ જાહેર કરીને લોકોને સવારે 11 થી સાંજના 6 વાગ્યા સુધી બિનજરૂરી બહાર ન નીકળવાની સલાહ આપી છે. બીજી તરફ, ફ્રાન્સની રાજધાની પેરિસમાં પણ આકરી ગરમીને કારણે પ્રખ્યાત આઇફલ ટાવર અને લૂવ્ર મ્યુઝિયમ જેવા પ્રવાસી સ્થળોના સમયમાં મોટો ઘટાડો કરવો પડ્યો છે. ફ્રાન્સના ઉત્તરી વિસ્તારોમાં વધુ પડતા પાવર વપરાશને કારણે વીજળી ગુલ થવાની સમસ્યા પણ સર્જાઈ રહી છે.
રેલવે ટ્રેક ઓગળવાનો ભય, મુસાફરી થંભી
આ રેકોર્ડબ્રેક ગરમીના કારણે રેલવે ઇન્ફ્રાસ્ટ્રક્ચરને મોટું નુકસાન થવાની ભીતિ સેવાઈ રહી છે. વધુ પડતા તાપમાનને લીધે રેલવેના પાટા ફેલાઈ જવાનો (ટ્રેક બકલિંગ) અને ઓવરહેડ પાવર લાઈનો તૂટી જવાનો ખતરો વધી ગયો છે. સુરક્ષાના પગલે ફ્રાન્સ અને ઇટાલીમાં અનેક લાંબા અંતરની ટ્રેનો કાં તો રદ કરવામાં આવી છે અથવા તેમની ગતિ ધીમી કરી દેવાઈ છે. રેલવે ઓથોરિટીએ મુસાફરોને અત્યારે કોઈ પણ પ્રકારની બિનજરૂરી મુસાફરી ન કરવાની કડક અપીલ કરી છે.
જંગલોમાં આગ અને અન્ય ગંભીર અકસ્માતો
માત્ર પશ્ચિમ યુરોપ જ નહીં, પરંતુ ગ્રીસ જેવા દેશોમાં પણ તાપમાન 41 ડિગ્રીને આંબી ગયું છે, જેના કારણે ત્યાંના સૂકા જંગલોમાં ભીષણ આગ (વાઇલ્ડફાયર) ફાટી નીકળવાનો ખતરો પેદા થયો છે. આ ઉપરાંત, ગરમીથી બચવા માટે સ્થાનિક લોકો અને પ્રવાસીઓ નદીઓ તેમજ તળાવો તરફ વળી રહ્યા છે, જેના કારણે ડૂબી જવાની ઘટનાઓમાં પણ ચિંતાજનક વધારો થયો છે. હવામાન વિભાગના મતે આગામી દિવસોમાં સ્પેન અને જર્મનીના કેટલાક ભાગોમાં પારો 44 ડિગ્રી સુધી પહોંચી શકે છે, જે આગામી સમયમાં સ્થિતિ વધુ ગંભીર બનવાના સંકેત આપે છે.
આ પણ વાંચો:PoK Protests: ઇસ્લામાબાદની નીતિઓ સામે PoK ની જનતામાં આક્રોશ,પાકિસ્તાન સરકારે સપ્લાય રોકતા વિરોધ
