ફ્લાયદુબઈ (Flydubai)ની ફ્લાઇટમાં ભારતીય કેપ્ટન સ્મિત મચ્છર પર હુમલો કરનાર સહ-પાઇલટ (કો-પાઇલટ) અંગે નવી વિગતો સામે આવી છે. સંયુક્ત આરબ અમીરાત (UAE)ની તપાસ મુજબ, 29 વર્ષીય ઓમાની સહ-પાઇલટનો ઈરાદો ઈઝરાયેલના તેલ અવીવ સ્થિત બેન ગુરિયન એરપોર્ટ પર વિમાનને ક્રેશ કરવાનો હતો. તેનો ઉદ્દેશ્ય અમેરિકામાં થયેલા 9/11ના હુમલાનું પુનરાવર્તન કરવાનો અને મહત્તમ જાનહાનિ સર્જવાનો હતો.
વિમાનમાં 170થી વધુ મુસાફરો સવાર હતા. જેમાંથી મોટાભાગના ઈઝરાયેલી હતા. સહ-પાઇલટે કુહાડી વડે કેપ્ટન પર હુમલો કર્યો અને વિમાનને ક્રેશ કરવાનો પ્રયાસ કર્યો. જોકે, કેપ્ટન સ્મિત કોકપિટનો દરવાજો ખોલવામાં સફળ રહ્યા અને મુસાફરોએ હુમલાખોરને કાબૂમાં લીધો. વિમાનમાં સવાર અન્ય પાઇલટોએ વિમાનનું નિયંત્રણ સંભાળ્યું અને સાઉદી અરેબિયામાં સુરક્ષિત રીતે ઉતરાણ કર્યું.
ઓસ્ટ્રેલિયામાં તે કઈ રીતે કટ્ટરપંથી વિચારધારા તરફ વળ્યો?
UAEના એટર્ની જનરલ હમાદ સૈફ અલ શમસીના જણાવ્યા અનુસાર, લગભગ એક દાયકા પહેલા ઓસ્ટ્રેલિયામાં અભ્યાસ કરતી વખતે આ સહ-પાઇલટ કટ્ટરપંથી વિચારધારાઓથી પ્રભાવિત થયો હતો. એક અહેવાલ મુજબ, હમ્મામ અલ-હમ્મામીએ 2015 અને 2017 વચ્ચે મેલબોર્નમાં રોયલ મેલબોર્ન ઇન્સ્ટિટ્યૂટ ઓફ ટેક્નોલોજી (RMIT)માં અભ્યાસ કર્યો હતો પરંતુ તેની એન્જિનિયરિંગની ડિગ્રી પૂર્ણ કરી ન હતી.
તપાસમાં બહાર આવ્યું છે કે તેણે આતંકવાદી સંગઠનો અને આત્મઘાતી હુમલાઓને સમર્થન આપતા પુસ્તકો અને ઓનલાઇન સામગ્રીનો અભ્યાસ કરવાનું શરૂ કર્યું હતું. એવા અહેવાલો પણ છે કે તેને 'મુસ્લિમ બ્રધરહુડ' સાથે જોડાયેલા જૂથો તરફથી સમર્થન મળ્યું હતું. તે 9/11ના હુમલા અને 'તકફીર' (Takfir) વિચારધારાથી પ્રભાવિત હતો. એવી માન્યતા પ્રણાલી જેમાં એક મુસ્લિમ બીજા મુસ્લિમની શ્રદ્ધા કે ધર્મ પર સવાલ ઉઠાવી તેને ધર્મના દાયરાની બહાર ગણાવી શકે છે.
શું તેણે હુમલો કરવા માટે જ પાઇલટ બનવાનું નક્કી કર્યું હતું?
તપાસકર્તાઓના જણાવ્યા અનુસાર, સહ-પાઇલટે કબૂલાત કરી હતી કે હવાઈ હુમલો કરવાની તેની યોજના પાઇલટ બનવાના તેના નિર્ણય સાથે જોડાયેલી હતી. તે જાન્યુઆરી 2016માં ફ્લાયદુબઈમાં જોડાયો હતો. આ પહેલાં, તેણે ચાર વર્ષ સુધી 'ઓમાન એર' માટે અને ટૂંકા ગાળા માટે મોરોક્કોની 'રોયલ એર મારોક' માટે કામ કર્યું હતું. તેણે તેલ અવીવની બે ફ્લાઇટ્સમાંથી રૂટની માહિતી એકત્રિત કરી હતી. તેણે કટ્ટરપંથી સામગ્રીનો અભ્યાસ કર્યો અને બોક્સિંગ પણ શીખ્યું. તેનો દાવો છે કે તેણે આ સંપૂર્ણ યોજના જાતે જ ઘડી હતી.
સુરક્ષા તપાસ દરમિયાન તે કેમ પકડાયો નહીં?
યુએઈ (UAE) ના જણાવ્યા અનુસાર, નોકરી પર રાખતા પહેલા તેણે તમામ જરૂરી સુરક્ષા તપાસ પૂર્ણ કરી હતી અને સારા ચારિત્ર્યનું પ્રમાણપત્ર રજૂ કર્યું હતું. તેની પૃષ્ઠભૂમિની તપાસમાં તેના ઈરાદાઓ વિશે કોઈ માહિતી મળી ન હતી. જોકે, 'ધ ન્યૂ યોર્ક ટાઈમ્સ'ના અહેવાલ મુજબ, ઓમાનના અધિકારીઓએ અગાઉ તેના કટ્ટરપંથી વિચારોની તપાસ કરી હતી. હવે પ્રશ્ન એ થાય છે કે, આ બધું હોવા છતાં તેને આટલા સંવેદનશીલ રૂટ પર વિમાન ઉડાવવાની મંજૂરી કેવી રીતે આપવામાં આવી?
આ પણ વાંચો: CJP Protest: 'બધાને અંદર કરી દીધા, હું પણ...', દિલ્હી પહોંચતા જ અભિજીત દિપકેએ આ શું કહ્યું?