ફ્રાન્સમાં આયોજિત G-7 સમિટ દરમિયાન વડા પ્રધાન નરેન્દ્ર મોદી અને યુએસ પ્રમુખ ડોનાલ્ડ ટ્રમ્પ વચ્ચે જોવા મળેલી કેમેસ્ટ્રી સમગ્ર વિશ્વમાં ચર્ચાનો વિષય બની છે. બંને નેતાઓ ૧૫ મહિનાના લાંબા અંતરાલ બાદ રૂબરૂ મળ્યા હતા, અને તેમની વચ્ચેની આ મુલાકાત અત્યંત ઉષ્માભરી અને સૌહાર્દપૂર્ણ રહી હતી. છેલ્લે બંને નેતાઓ ગયા વર્ષે ફેબ્રુઆરીમાં મળ્યા હતા.
પીએમ મોદીનું કરાયું ઉષ્માભર્યું સ્વાગત
સમિટ હોલમાં જ્યારે પીએમ મોદી પ્રવેશ્યા, ત્યારે રાઉન્ડ ટેબલ પર પહેલેથી જ બિરાજમાન ટ્રમ્પે ઉભા થઈને તેમનું ભવ્ય સ્વાગત કર્યું હતું. બંને નેતાઓએ હાથ મિલાવીને એકબીજાનું અભિવાદન કર્યું હતું, જે ભારત અને અમેરિકા વચ્ચેના મજબૂત સંબંધોની સાક્ષી પૂરે છે. આ મુલાકાત દરમિયાન બંને નેતાઓ વચ્ચે એક અનોખું ગાઢ બંધન સ્પષ્ટપણે જોવા મળતું હતું.
બંને નેતાઓ ગહન ચર્ચામાં જોવા મળ્યા
સમિટની શરૂઆત સાથે જ બંને નેતાઓ સામ-સામે કે બાજુ-બાજુની ખુરશીઓ પર બેઠા હતા. આ બેઠક દરમિયાન બંને દિગ્ગજ નેતાઓ વૈશ્વિક મુદ્દાઓ પર લાંબી અને ગંભીર ચર્ચા કરતા જોવા મળ્યા હતા. સમિટના ગ્રુપ ફોટો સેશન દરમિયાન પણ એક સુંદર દ્રશ્ય જોવા મળ્યું હતું. પીએમ મોદીએ સ્ટેજ પર ચઢતી વખતે ડોનાલ્ડ ટ્રમ્પને સહારો આપ્યો હતો અને તેમનો હાથ પકડીને તેઓ ખૂબ જ આત્મીયતાથી વાતચીત કરી રહ્યા હતા.
વૈશ્વિક મંચ પર ભારતનું મહત્વ
કેમેરામાં કેદ થયેલી આ તસવીરો માત્ર બે વ્યક્તિઓની મુલાકાત નથી, પરંતુ તે બે લોકશાહી દેશો વચ્ચેના સકારાત્મક રાજદ્વારી સંબંધોનું પ્રતીક છે. આ અનૌપચારિક મુલાકાતોએ સાબિત કરી દીધું છે કે પીએમ મોદી અને ટ્રમ્પ વચ્ચેના વ્યક્તિગત સંબંધો કેટલા મજબૂત છે. G-7 જેવી વૈશ્વિક મંચ પર આ બંને નેતાઓની કેમેસ્ટ્રીને વિશ્વના અન્ય નેતાઓ પણ કુતૂહલ અને આદરની દ્રષ્ટિએ જોઈ રહ્યા હતા. આ મુલાકાતથી ભવિષ્યમાં ભારત અને અમેરિકાના વ્યૂહાત્મક સંબંધો વધુ ગાઢ બનશે તેવી આશા બંધાઈ છે.
આ પણ વાંચોઃ G7 Summit: બીબીએ લેબનોન મામલે હવે જવાબદારીપૂર્વક વર્તવું પડશે, સમિટમાં ફરી વખત ટ્રમ્પે નેતન્યાહૂને ચેતવ્યા
