ફ્રાન્સમાં ચાલી રહેલી રાજકીય અને સામાજિક અશાંતિ બાદ હવે જર્મનીમાં પણ યુવાનોનો આક્રોશ ફાટી નીકળ્યો છે. શનિવારે રાત્રે જર્મનીના વિવિધ શહેરોમાં Gen-Z (આધુનિક યુવા પેઢી)ના વિરોધીઓએ શિક્ષણ ભંડોળમાં વધારો કરવા અને ફરજિયાત લશ્કરી સેવાનો વિરોધ કરવા માટે રસ્તા પર ઉતરીને ભારે વિરોધ પ્રદર્શન કર્યું હતું. ‘Gen Z Regelt’ નામના યુવા જૂથ દ્વારા આયોજિત આ આંદોલન બર્લિન, ફ્રેન્કફર્ટ અને મ્યુનિક સહિત દેશના ૩૪ થી વધુ શહેરોમાં ફેલાઈ ગયું છે. આ પ્રદર્શન સમગ્ર યુરોપમાં યુવાનો દ્વારા વધુ આર્થિક સુરક્ષા અને સુધારેલી સરકારી સેવાઓની માંગ માટે ચલાવવામાં આવી રહેલી વ્યાપક ચળવળનો જ એક ભાગ છે.

ફ્રેન્કફર્ટ અને હેમ્બર્ગમાં હિંસક અંકડા

જર્મનીના ફ્રેન્કફર્ટ શહેરમાં વિરોધ પ્રદર્શને અત્યંત હિંસક સ્વરૂપ ધારણ કર્યું હતું. ઉપદ્રવીઓએ શહેરના કેન્દ્રમાં આવેલી ઘણી દુકાનોની બારીઓ તોડી પાડી હતી અને ઓછામાં ઓછા બે મોટા સ્ટોરમાં લૂંટફાટ ચલાવી હતી. સ્થિતિને અંકુશમાં લેવા પહોંચેલી ઇમરજન્સી સેવાઓ અને પોલીસ ટુકડીઓ પર તોફાનીઓએ મોલોટોવ કોકટેલ (પેટ્રોલ બોમ્બ) વડે હુમલા કર્યા હતા. બીજી તરફ, હેમ્બર્ગમાં વિરોધીઓએ રસ્તાઓ પર બેરિકેડ્સ મૂકી તેમાં આગ ચાંપી દીધી હતી. હિંસાને પગલે ફ્રેન્કફર્ટ પોલીસે નાગરિકોને શહેરના મુખ્ય વિસ્તારોથી દૂર રહેવા અથવા તુરંત જગ્યા ખાલી કરવા માટે અપીલ કરી હતી.

સરકારી સેવાઓ અને લશ્કરી સેવાનો વિરોધ

બર્લિનમાં યોજાયેલી એક રેલી દરમિયાન ‘Gen Z Regelt’ ના પ્રવક્તા લેના ફ્રેડરિચે સ્પષ્ટ કર્યું હતું કે, "અમે અહીં યુદ્ધ કે બળજબરીથી અપાતી લશ્કરી સેવા માટે નહીં, પરંતુ શાંતિ, સ્વતંત્રતા અને ભવિષ્ય માટે લડી રહ્યા છીએ." યુવાનોની મુખ્ય માંગણી શિક્ષણ અને આરોગ્ય પ્રણાલીઓમાં વધુ સરકારી રોકાણ કરવાની તેમજ ફરજિયાત લશ્કરી સેવા રદ કરીને જવાબદારીઓનું ન્યાયી વિતરણ કરવાની છે.

ઉગ્રવાદી જૂથોની ઘૂસણખોરીનો ભય

જર્મન અધિકારીઓના જણાવ્યા મુજબ મોટાભાગના વિસ્તારોમાં શાંતિપૂર્ણ માર્ચ યોજાઈ હતી, પરંતુ જર્મન ગૃહ મંત્રાલયે ચેતવણી આપી છે કે ડાબેરી ઉગ્રવાદી જૂથો અને વિદેશી ચળવળો ભીડનો લાભ લઈને સ્થિતિ વણસાવવાનો પ્રયાસ કરી રહ્યા છે. ફ્રેન્કફર્ટના ગૃહ પ્રધાન રોમન પોસેકે ફ્રાન્સની હિંસક સ્થિતિનો ઉલ્લેખ કરીને કાયદો અને વ્યવસ્થા જાળવવા કડક કાર્યવાહીની ચેતવણી આપી છે.

આ પણ વાંચોઃ Cyclone Update: દેશમાં આવી રહ્યો છે નવો ખતરો, બંગાળની ખાડીમાં સર્જાયુ નવું લો પ્રેશર