વૈશ્વિક તેલ પુરવઠા અને દરિયાઈ વેપાર માટે સૌથી મહત્વના ગણાતા 'સ્ટ્રેટ ઓફ હોર્મુઝ' પર ઈરાને પોતાનું નિયંત્રણ મજબૂત કર્યું છે. ઈરાને 'પર્શિયન ગલ્ફ સ્ટ્રેટ ઓથોરિટી' નામની એક નવી સરકારી એજન્સીની રચના કરી છે, જે હવે આ માર્ગ પરથી પસાર થતા દરેક જહાજની તપાસ કરશે અને તેમની પાસેથી ટોલ ટેક્સ વસૂલશે. લોયડ લિસ્ટ ઇન્ટેલિજન્સના અહેવાલ મુજબ, ઈરાન આ એજન્સીને એકમાત્ર કાયદેસર સંસ્થા તરીકે રજૂ કરી રહ્યું છે.
વૈશ્વિક બજારમાં ચિંતા અને આશા
ઈરાનના આ પગલાથી આંતરરાષ્ટ્રીય શિપિંગ જગતમાં ફફડાટ ફેલાયો છે, કારણ કે ફારસની ખાડીમાં સેંકડો વ્યાપારી જહાજો ફસાયેલા છે. બીજી તરફ, બે મહિનાથી ચાલી રહેલા યુદ્ધના અંતની આશાએ વૈશ્વિક બજારોમાં થોડી પોઝિટિવ અસર પણ જોવા મળી છે. ઈરાન હાલમાં પાકિસ્તાન દ્વારા મોકલવામાં આવેલા અમેરિકાના શાંતિ પ્રસ્તાવની સમીક્ષા કરી રહ્યું છે.