પશ્ચિમ એશિયા (ખાડી પ્રદેશ)માં એક વાર ફરી સ્થિતિ અત્યંત નાજુક બની ગઈ છે. યમનના ઈરાન સમર્થિત હુથી બળવાખોરો અને સાઉદી અરેબિયા વચ્ચેનો સંઘર્ષ હવે ફરી એકવાર ચરમસીમાએ પહોંચ્યો છે. તાજેતરમાં હુતી બળવાખોરો દ્વારા સાઉદી અરેબિયાના મહત્વપૂર્ણ અને વ્યસ્ત એવા દમ્મામ એરપોર્ટને લક્ષ્ય બનાવીને એક વિનાશક અને ભીષણ હુમલો કરવામાં આવ્યો હતો. આ હુમલા બાદ એરપોર્ટ પર ભારે અફરાતફરીનો માહોલ સર્જાયો હતો. સુરક્ષાના કારણોસર અનેક આંતરરાષ્ટ્રીય અને સ્થાનિક ફ્લાઇટ્સને તાત્કાલિક ધોરણે અન્ય સલામત એરપોર્ટ્સ તરફ ડાયવર્ટ કરવામાં આવી હતી. આ ઘટનાએ પશ્ચિમ એશિયામાં સુરક્ષા સંબંધી ચિંતાઓમાં ભારે વધારો કર્યો છે.
બિન-જરૂરી કર્મચારીઓને સલામત સ્થળે ખસેડાયા
આ ગંભીર અને ભયાનક સ્થિતિને ધ્યાનમાં રાખીને ટ્રમ્પ વહીવટીતંત્રે એક અત્યંત મહત્વપૂર્ણ અને આશ્ચર્યજનક નિર્ણય લીધો છે. ખાડી ક્ષેત્રમાં વધતા જતા લશ્કરી તણાવને જોતા અમેરિકાએ તેના દૂતાવાસો અને કૂટનીતિક મિશન્સમાંથી બિન-જરૂરી કર્મચારીઓ તેમજ તેમના પરિવારોને તાત્કાલિક ધોરણે સલામત સ્થળે ખસેડવાની તૈયારીઓ શરૂ કરી દીધી છે. ત્રણ વરિષ્ઠ અમેરિકન અધિકારીઓએ આ વાતની પુષ્ટિ કરતા જણાવ્યું છે કે યુએસ સ્ટેટ ડિપાર્ટમેન્ટ દ્વારા ટૂંક સમયમાં જ કેટલાક અમેરિકી દૂતાવાસો માટે "ઓર્ડર્ડ ડિપાર્ચર" (તમામ બિન-જરૂરી સ્ટાફને દેશ છોડવાનો આદેશ) જારી કરવામાં આવી રહ્યો છે.