યમનમાં હુતી વિદ્રોહીઓ અને આંતરરાષ્ટ્રીય સ્તરે માન્યતા પ્રાપ્ત સરકાર વચ્ચેનો સૈન્ય સંઘર્ષ હવે અત્યંત ભયાનક મોડ પર પહોંચી ગયો છે. ગુરુવારે હુથી દળોએ યમનના અદન સ્થિત 'અલ-માશિક' રાષ્ટ્રપતિ મહેલને નિશાન બનાવીને ભીષણ હુમલો કર્યો હતો. આ મિસાઇલ હુમલામાં બે સુરક્ષા જવાનો શહીદ થયા હતા અને છ અન્ય ગંભીર રીતે ઘવાયા છે. જોકે, આ હુમલા સમયે અદનમાં હાજર યમન સરકારના તમામ કેબિનેટ મંત્રીઓ સંપૂર્ણપણે સુરક્ષિત હોવાનું સામે આવ્યું છે. યમનના યુવા મંત્રી નાયફ સાલેહ અલ-બકરીએ સ્પષ્ટ કર્યું છે કે આવા કાયરતાપૂર્ણ હુમલાઓથી ડરીને સરકારી પ્રતિનિધિઓ અદન શહેર છોડીને ક્યાંય જશે નહીં.
હુતીઓનો યમન પર સૌથી મોટો હુમલો
યમનની આંતરિક હિંસાની સાથે સાઉદી અરેબિયા સાથેનો સંઘર્ષ પણ ચિંતાજનક રીતે વધ્યો છે. હુતી સૈન્ય પ્રવક્તા યાહ્યા સરીએ દાવો કર્યો હતો કે તેમના સંગઠને બેલેસ્ટિક મિસાઇલો, ક્રુઝ મિસાઇલો અને આત્મઘાતી ડ્રોન દ્વારા સાઉદી અરેબિયાની મહત્વપૂર્ણ ઊર્જા સુવિધાઓ અને પાટનગર રિયાધના આંતરરાષ્ટ્રીય એરપોર્ટ પર શ્રેણીબદ્ધ હુમલા કર્યા છે. તેમણે દાવો કર્યો હતો કે આ હુમલાથી લક્ષ્યાંકિત સ્થળો પર ભારે તારાજી સર્જાઈ છે. હુથીઓએ આંતરરાષ્ટ્રીય શિપિંગ કંપનીઓ અને સામાન્ય નાગરિકોને સાઉદીના એરપોર્ટ અને તેલ સ્થાપનોથી દૂર રહેવાની કડક ચેતવણી પણ આપી છે.