મધ્ય પૂર્વ (મિડલ ઈસ્ટ)માં વધી રહેલા યુદ્ધના તણાવ અને હોર્મુઝની સામુદ્રધુની (Strait of Hormuz) પર સર્જાયેલા સંકટ વચ્ચે ભારતની ઉર્જા સુરક્ષા માટે રાહતના સમાચાર આવ્યા છે. ભારત હવે તેની LPG જરૂરિયાતો પૂરી કરવા માટે હજારો કિલોમીટર દૂર આવેલા દક્ષિણ અમેરિકન દેશ આર્જેન્ટિના પર ભરોસો મૂકી રહ્યું છે.
હોર્મુઝ સંકટ અને ભારતની રણનીતિ
ભારત તેની જરૂરિયાતનો લગભગ 60 ટકા ગેસ હોર્મુઝ સ્ટ્રેટ દ્વારા આયાત કરે છે. ઈરાન-ઈઝરાયેલ સંઘર્ષને કારણે આ રૂટ પર જોખમ વધતા ભારત સરકારે ઉર્જા સ્ત્રોતોનું 'ડાયવર્સિફિકેશન' કરવાની નીતિ અપનાવી છે. આ કડીમાં આર્જેન્ટિના એક મજબૂત ભાગીદાર તરીકે ઉભરી આવ્યું છે.
આયાતમાં રેકોર્ડબ્રેક ઉછાળો
વર્ષ 2026ના પ્રથમ ત્રણ મહિનામાં જ આર્જેન્ટિનાએ ભારતને 50,000 ટન LPG સપ્લાય કર્યો છે. જે વર્ષ 2025ના કુલ 22,000 ટન આયાત કરતા બમણાથી પણ વધુ છે. અહેવાલો મુજબ, 5 માર્ચના રોજ વધુ 11,000 ટન ગેસનો જથ્થો આર્જેન્ટિનાના બાહિયા બ્લાંકા પોર્ટથી ભારત માટે રવાના થયો છે.
લાંબા ગાળાની ભાગીદારી
ભારતમાં આર્જેન્ટિનાના રાજદૂત મારિયાનો અગસ્ટિન કૌસિનોએ જણાવ્યું છે કે, આર્જેન્ટિના પાસે ગેસનો વિશાળ ભંડાર છે, અને તેઓ ભારતને લાંબા ગાળા સુધી સપ્લાય કરવા તૈયાર છે. આર્જેન્ટિનાની ઓઈલ કંપનીના વડા અને ભારતના ઉર્જા મંત્રી હરદીપ સિંહ પુરી વચ્ચે થયેલી અનેક બેઠકો બાદ આ સહયોગ હવે વેગ પકડી રહ્યો છે.
https://x.com/ANI/status/2036719798940537084
અંતરનું પડકાર છતાં ફાયદો
આર્જેન્ટિનાના બાહિયા બ્લાંકાથી ગુજરાતના દહેજ પોર્ટ સુધીનું અંતર લગભગ 20,000 કિમી છે. આટલી લાંબી મુસાફરીને કારણે શિપિંગ ખર્ચ વધે છે, તેમ છતાં ઉર્જા સુરક્ષા અને મિડલ ઈસ્ટ પરની નિર્ભરતા ઘટાડવા માટે ભારત આ જોડાણને પ્રાથમિકતા આપી રહ્યું છે.
આ પણ વાંચો - Indian Armyનું નવું 'શૌર્ય સ્ક્વાડ્રોન', હવે ટેન્કો પહેલા દુશ્મનને ડરાવશે ડ્રોન
