Hamas Israel Ceasefire : ગાઝામાંથી બંધકોને મુક્ત કરવાના નિર્ણયનું PM મોદીએ કર્યું સ્વાગત, શાંતિ સ્થાપિત કરવા માટે રાષ્ટ્રપતિ ટ્રમ્પના પ્રયત્નોનું કર્યું સમર્થન

હમાસ અને ઈઝરાયલ વચ્ચેના યુદ્ધવિરામની અસર હવે દેખાઈ રહી છે. ઈઝરાયલમાં હમાસ દ્વારા રાખવામાં આવેલા તમામ 20 બચી ગયેલા બંધકોને મુક્ત કરવામાં આવ્યા છે. તેઓ બે વર્ષથી વધુ સમયથી બંધક હતા. વડાપ્રધાન નરેન્દ્ર મોદીએ મુક્તિનું સ્વાગત કર્યું અને કહ્યું કે ભારત આ ક્ષેત્રમાં શાંતિ લાવવા માટે યુએસ પ્રમુખ ડોનાલ્ડ ટ્રમ્પના "નિષ્ઠાવાન પ્રયાસો"ને સમર્થન આપે છે. રાષ્ટ્રપતિ ટ્રમ્પની ગાઝા શાંતિ યોજનાના પ્રથમ તબક્કાના ભાગ રૂપે હમાસે બંધકોને મુક્ત કર્યા છે.

શું કહ્યું વડાપ્રધાન મોદીએ?

પીએમ નરેન્દ્ર મોદીએ સોશિયલ સાઈટ 'X' પર કહ્યું, "બે વર્ષથી વધુ સમય સુધી બંધક બનાવ્યા બાદ અમે બધા બંધકોની મુક્તિનું સ્વાગત કરીએ છીએ." વડાપ્રધાન મોદીએ કહ્યું કે બંધકોની મુક્તિ તેમના પરિવારોની હિંમત, અમેરિકી રાષ્ટ્રપતિ ટ્રમ્પના અતૂટ શાંતિ પ્રયાસો અને ઈઝરાયલી વડાપ્રધાન નેતન્યાહૂના દૃઢ નિશ્ચયનું પ્રતીક છે. તેઓ પ્રદેશમાં શાંતિ લાવવાના રાષ્ટ્રપતિ ડોનાલ્ડ ટ્રમ્પના નિષ્ઠાવાન પ્રયાસોને સમર્થન આપે છે.

ગાઝા શાંતિ યોજના પછી કેદીઓની મુક્તિ શરૂ થઈ

ગાઝા શાંતિ યોજના હેઠળ ઈઝરાયલ આશરે 2,000 કેદીઓ અને અટકાયતીઓને મુક્ત કરી રહ્યું છે. ઈઝરાયલી સંસદને સંબોધતા ટ્રમ્પે ગાઝા શાંતિ પ્રક્રિયાને "નવા મધ્ય પૂર્વનો પ્રારંભ" ગણાવ્યો અને કહ્યું કે એક "સુંદર અને ઉજ્જવળ ભવિષ્ય" અચાનક આ પ્રદેશની પહોંચમાં આવી ગયું છે. શુક્રવારે ગાઝામાં યુદ્ધવિરામ અમલમાં આવતા ટ્રમ્પે કહ્યું, "બે કષ્ટદાયક વર્ષોના અંધકાર અને કેદ પછી 20 હિંમતવાન બંધકો તેમના પરિવારોના ગૌરવપૂર્ણ આલિંગનમાં પાછા ફરી રહ્યા છે."

ટ્રમ્પના પ્રયાસોને કારણે શાંતિ પરત આવી

હમાસે ઈઝરાયલી શહેરો પર હુમલો કર્યા બાદ ઈઝરાયલે 7 ઓક્ટોબર, 2023ના રોજ ગાઝામાં યુદ્ધ શરૂ કર્યું હતું, જેમાં આશરે 1,200 લોકો માર્યા ગયા હતા. હુમલા દરમિયાન હમાસે આશરે 251 લોકોને બંધકો બનાવ્યા હતા. કેટલાક બંધકોને પહેલાથી જ મુક્ત કરવામાં આવ્યા છે. ગાઝાના હમાસ સંચાલિત આરોગ્ય મંત્રાલયના જણાવ્યા અનુસાર ત્યારથી ઈઝરાયલી લશ્કરી કાર્યવાહીમાં 66,000થી વધુ પેલેસ્ટિનિયનો માર્યા ગયા છે. ગાઝા એક મોટા માનવતાવાદી સંકટનો સામનો કરી રહ્યું છે, જેનું મુખ્ય કારણ ખોરાક અને દવાનો અભાવ છે. વિશ્વ આરોગ્ય સંગઠને ગયા મહિને કહ્યું હતું કે ગાઝામાં કુપોષણનો દર "ચિંતાજનક સ્તરે" પહોંચી ગયો છે.