આંતરરાષ્ટ્રીય સ્તરેથી એક અત્યંત ચિંતાજનક અને હૃદયદ્રાવક સમાચાર સામે આવી રહ્યા છે. મેક્સિકોના પૂર્વ-મધ્ય રાજ્ય પુએબ્લાના તેહુઇટ્ઝિંગો શહેરમાં એક અજાણ્યા હુમલાખોરે અંધાધૂંધ ગોળીબાર કરીને ભારે આતંક મચાવ્યો છે. રવિવારની વહેલી સવારે બનેલી આ લોહિયાળ ઘટનામાં ઓછામાં ઓછા 10 લોકોના ઘટનાસ્થળે જ કમકમાટીભર્યા મોત નીપજ્યા છે.
ફાયરિંગમાં 10 લોકોના મોત
પુએબ્લાની જાહેર સુરક્ષા એજન્સી દ્વારા બહાર પાડવામાં આવેલા સત્તાવાર નિવેદન અનુસાર, આ હુમલાનો ભોગ બનેલા લોકોમાં 6 પુરુષો, 3 મહિલાઓ અને એક નિર્દોષ બાળકનો સમાવેશ થાય છે. રવિવારની સવારે જ્યારે લોકો પોતાના કામમાં વ્યસ્ત હતા, ત્યારે અચાનક થયેલા આ હુમલાથી સમગ્ર વિસ્તારમાં સન્નાટો વ્યાપી ગયો હતો. હાલમાં ફેડરલ એજન્સીઓ અને સ્થાનિક પોલીસ દ્વારા આ મામલે સઘન તપાસ શરૂ કરવામાં આવી છે, પરંતુ હજુ સુધી આ નરસંહાર પાછળના મુખ્ય શંકાસ્પદ કે તેના હેતુ વિશે કોઈ ચોક્કસ માહિતી મળી શકી નથી.
અગાઉ પણ થઇ ચૂક્યા છે હુમલા
પુએબ્લા રાજ્યમાં હિંસાની આ કોઈ પ્રથમ ઘટના નથી. આ અગાઉ ફેબ્રુઆરી મહિનાની શરૂઆતમાં હુએહુએટલાન એલ ગ્રાન્ડે શહેરમાં છ લોકોની હત્યા કરવામાં આવી હતી. તેના થોડા જ દિવસો બાદ રાજધાની શહેરમાં એક વાહન હુમલામાં વધુ ત્રણ લોકોએ જીવ ગુમાવ્યા હતા. મધ્ય મેક્સિકોમાં ડ્રગ કાર્ટેલ અને ગેંગ વોરની હિંસા એટલી હદે વધી ગઈ છે કે અત્યાર સુધીમાં 800 થી 1,000 જેટલા પરિવારોને પોતાના ઘર છોડીને પલાયન થવાની ફરજ પડી છે. જો કે, આ તાજી ઘટના અંગે પુએબ્લાના ગવર્નર અલેજાન્ડ્રો આર્મેન્ટા તરફથી હજુ સુધી કોઈ સત્તાવાર પ્રતિક્રિયા આપવામાં આવી નથી.
યુક્રેનની સુપરમાર્કેટમાં પણ ફાયરિંગ: 6 લોકોના મોત, હુમલાખોર ઠાર
મેક્સિકોની આ ઘટનાની જેમ જ ગયા મહિને યુક્રેનની રાજધાની કિવમાં પણ આવી જ એક ભયાનક ઘટના પ્રકાશમાં આવી હતી. કિવના હોલોસિવસ્કી જિલ્લામાં આવેલી એક સુપરમાર્કેટમાં એક સશસ્ત્ર બંદૂકધારીએ ઘૂસીને ત્યાં હાજર લોકોને બંધક બનાવી લીધા હતા. આતંક ફેલાવ્યા બાદ તે સિરિયલ કિલરે છ નિર્દોષ લોકોની ગોળી મારીને હત્યા કરી દીધી હતી.
આ પણ વાંચોઃ World News: માઉન્ટેન હોમ એરબેઝ પર હવામાં બે નેવી ફાઇટર જેટ્સ એકબીજા સાથે અથડાયા, જુઓ કઈ રીતે ક્રૂ મેમ્બર્સનો જીવ બચ્યો
