મધ્ય પૂર્વ વિસ્તારમાં ફરી એકવાર તણાવ વધતો જોવા મળી રહ્યો છે. તાજેતરમાં તુર્કીએ દાવો કર્યો હતો કે ઈરાન તરફથી છોડવામાં આવેલી બેલિસ્ટિક મિસાઈલને નાટો સંરક્ષણ પ્રણાલીએ તોડી પાડી છે. પરંતુ આ દાવાને ઈરાને સંપૂર્ણપણે નકારી કાઢ્યો છે. આ ઘટનાના કારણે બંને દેશો વચ્ચે રાજદ્વારી સ્તરે તણાવ વધી ગયો છે.
બુધવારે એક નિવેદન જાહેર
તુર્કીના સંરક્ષણ મંત્રાલયે બુધવારે એક નિવેદન જાહેર કરીને જણાવ્યું હતું કે ઈરાન તરફથી છોડવામાં આવેલી એક બેલિસ્ટિક મિસાઈલ ઈરાક અને સીરિયાના હવાઈ ક્ષેત્રમાંથી પસાર થઈ તુર્કીના હવાઈ વિસ્તારમાં પ્રવેશતી જોવા મળી હતી. તુર્કીનો દાવો છે કે પૂર્વી ભૂમધ્ય સમુદ્રમાં તૈનાત નાટોની હવાઈ અને મિસાઈલ સંરક્ષણ વ્યવસ્થાએ આ મિસાઈલને સમયસર નિષ્ક્રિય કરી દીધી હતી.
મિસાઈલનો ચોક્કસ નિશાન
તુર્કીના મંત્રાલયે વધુમાં જણાવ્યું હતું કે મિસાઈલનો ચોક્કસ નિશાન શું હતું તે સ્પષ્ટ નથી. જોકે, આ ઘટનામાં કોઈ જાનહાનિ કે ઈજા થઈ નથી. તેમ છતાં, અંકારા સરકારે આ ઘટનાને ગંભીરતાથી લીધી છે અને કહ્યું છે કે દેશ તેના સાર્વભૌમત્વ સામેની કોઈપણ પ્રતિકૂળ કાર્યવાહીનો જવાબ આપવા માટે તૈયાર છે.
તુર્કી તેના નાટો સાથી દેશો સાથે સતત પરામર્શ
આ ઘટના બાદ તુર્કીના રાષ્ટ્રપતિ Recep Tayyip Erdoğanએ દેશને સંબોધતા કહ્યું કે તુર્કી તેના નાટો સાથી દેશો સાથે સતત પરામર્શ કરી રહ્યું છે અને આવી ઘટનાઓ ફરી ન બને તે માટે જરૂરી તમામ પગલાં લઈ રહ્યું છે. એર્દોગાને પોતાના સંબોધનમાં કહ્યું કે જો કોઈ દેશ શાંતિ અને સ્થિરતા સાથે રહેવા માંગે છે તો તેને પોતાની સુરક્ષા અને સંરક્ષણ ક્ષમતાઓને મજબૂત બનાવવી જ પડે. તેમણે ભાર મૂક્યો કે તુર્કી તેની સરહદો અને હવાઈ ક્ષેત્રની સુરક્ષા માટે કોઈ કસર છોડશે નહીં.
તુર્કી તેના નાટો સાથી દેશો સાથે સતત પરામર્શ
બીજી તરફ, ઈરાને તુર્કીના દાવાઓને સીધા શબ્દોમાં નકારી કાઢ્યા છે. ઈરાનના સશસ્ત્ર દળોએ સ્પષ્ટ જણાવ્યું છે કે તેમણે તુર્કી તરફ કોઈપણ પ્રકારની મિસાઈલ છોડેલી નથી. ઈરાનનું કહેવું છે કે તેઓ તુર્કીના સાર્વભૌમત્વનો સંપૂર્ણ આદર કરે છે અને તુર્કી તરફ કોઈ આક્રમક કાર્યવાહી કરવાનો પ્રશ્ન જ ઊભો થતો નથી.
વિસ્તારમાં અનાવશ્યક તણાવ
ઈરાનના અધિકારીઓએ કહ્યું કે આવા દાવાઓ વિસ્તારમાં અનાવશ્યક તણાવ ઉભો કરી શકે છે. તેમણે તમામ દેશોને શાંતિ અને સંવાદ દ્વારા સમસ્યાઓ ઉકેલવા અપીલ કરી છે. આ ઘટનાએ મધ્ય પૂર્વ અને યુરોપીય સુરક્ષા પરિસ્થિતિ અંગે નવા પ્રશ્નો ઊભા કર્યા છે. કારણ કે આ વિસ્તારમાં પહેલાથી જ ઘણા ભૂરાજકીય તણાવો ચાલી રહ્યા છે. નાટોની હાજરી અને મિસાઈલ સંરક્ષણ પ્રણાલી અંગે પણ ચર્ચા ફરી શરૂ થઈ છે. વિશ્લેષકોનું માનવું છે કે જો બંને દેશો વચ્ચે વાતચીત દ્વારા સ્થિતિ સ્પષ્ટ નહીં કરવામાં આવે તો રાજદ્વારી તણાવ વધુ વધી શકે છે. તેથી આવનારા દિવસોમાં આ મુદ્દે તુર્કી, ઈરાન અને નાટો વચ્ચે ચર્ચા થવાની શક્યતા પણ માનવામાં આવી રહી છે.
આ પણ વાંચો : Indian Ocean tension : હિંદ મહાસાગરમાં અમેરિકાનો હુમલો, ભારત માટે કેમ વધી રહી છે ચિંતા?
