વૈશ્વિક સ્તરે ચાલી રહેલા તણાવ વચ્ચે એક મોટા સમાચાર સામે આવ્યા છે. અમેરિકા અને ઈરાન વચ્ચે સીઝફાયર (યુદ્ધવિરામ) હોવા છતાં, અમેરિકાએ હોર્મુઝ સ્ટ્રેટના પ્રવેશદ્વાર પર આવેલા ઈરાનના વ્યૂહાત્મક રીતે મહત્વપૂર્ણ 'કેશમ દ્વીપ' (Qeshm Island) પર ભયાનક હુમલો કર્યો છે. ચાલુ સંઘર્ષ દરમિયાન આ ટાપુ પર અમેરિકાનો આ ચોથો હુમલો છે. યુએસ સેન્ટ્રલ કમાન્ડ (CENTCOM) ના જણાવ્યા અનુસાર, હેલફાયર મિઝાઈલ વડે કેશમ દ્વીપ નજીક એક ઓઈલ ટેન્કરને નિશાન બનાવવામાં આવ્યું હતું. આ પહેલા 1 જૂનના રોજ પણ અમેરિકાએ આત્મરક્ષા હેઠળ અહીં હુમલો કર્યો હતો. આ હુમલાના તુરંત બાદ ઈરાને વળતો પ્રહાર કરતા કુવૈત અને બહેરીનમાં આવેલા અમેરિકી સૈન્ય મથકોને નિશાન બનાવ્યા હતા, જેના કારણે ખાડી દેશોમાં ભારે તણાવ વ્યાપી ગયો છે.
સીઝફાયર છતાં કેમ થઈ રહી છે અથડામણ?
એપ્રિલની શરૂઆતમાં જ ઈરાન અને અમેરિકાએ સીઝફાયરની જાહેરાત કરી હતી અને બંને દેશો વચ્ચે પરમાણુ કરારને લઈને વાતચીત ચાલી રહી છે. તેમ છતાં, મે મહિનાના અંતથી અમેરિકાએ ઈરાનના કેટલાક ઠેકાણાઓ પર હુમલા શરૂ કર્યા છે. 'વોલ સ્ટ્રીટ જર્નલ'ના અહેવાલ મુજબ, અમેરિકાએ ઓમાનની ખાડીને બ્લોક કરી દીધી છે જેથી ઈરાનની હોર્મુઝ નાકાબંધીનો સામનો કરી શકાય. જોકે, તમામ આંતરરાષ્ટ્રીય પ્રતિબંધો છતાં ઈરાન ગુપ્ત રીતે રોજના 1.5 મિલિયન બેરલ તેલની સપ્લાય અવિરતપણે ચાલુ રાખવામાં સફળ રહ્યું છે, જેમાં કેશમ દ્વીપની ભૂમિકા સૌથી મોટી છે. અહીંથી તેલના ટેન્કરો શાંતિથી ઓમાનની ખાડી પાર કરીને ચીન તરફ આગળ વધી જાય છે.
