હાલમાં અમેરિકા અને ઈરાન વચ્ચે ડિજિટલ માધ્યમથી એક સમજૂતી પત્ર (MoU) પર હસ્તાક્ષર કરવામાં આવ્યા છે, જેણે આંતરરાષ્ટ્રીય રાજકારણમાં ગરમાવો લાવી દીધો છે. આ ઘટનાક્રમ બાદ ઈઝરાયલના વડા પ્રધાન બેન્જામિન નેતન્યાહૂએ પોતાની પ્રથમ પ્રતિક્રિયા આપતા સ્પષ્ટ કર્યું છે કે ઈઝરાયલ પોતાની સુરક્ષા બાબતે કોઈ બાંધછોડ નહીં કરે.
નેતન્યાહૂનું મક્કમ વલણ
યુએસ પ્રમુખ ડોનાલ્ડ ટ્રમ્પ અને ઈરાનના પ્રતિનિધિઓ વચ્ચે થયેલા આ કરાર અંગે નેતન્યાહૂએ કહ્યું કે, "ઈઝરાયલ અને અમેરિકાના હિતો અલગ હોઈ શકે છે. એક વડા પ્રધાન તરીકે, મારી પ્રાથમિક જવાબદારી ઈઝરાયલની સુરક્ષાની છે." તેમણે ઉમેર્યું કે ટ્રમ્પ સાથેના તેમના મતભેદો સામાન્ય છે, પરંતુ ઈરાનને પરમાણુ શસ્ત્રો પ્રાપ્ત કરતા અટકાવવા એ તેમના જીવનનું મિશન છે. તેમણે અત્યંત મક્કમતાથી કહ્યું કે, "કોઈ પણ કરાર થાય કે ન થાય, જ્યાં સુધી હું વડાપ્રધાન છું, ત્યાં સુધી ઈરાનને પરમાણુ શસ્ત્રો મેળવવા દઈશ નહીં."
સુરક્ષા અને લશ્કરી કાર્યવાહી
પોતાના વહીવટની ટીકાઓનો સામનો કરી રહેલા નેતન્યાહૂએ પોતાની ઉપલબ્ધિઓ ગણાવતા કહ્યું કે, ઈઝરાયલે વર્ષોથી ઈરાનના પરમાણુ વૈજ્ઞાનિકો, આતંકવાદી નેતાઓ અને મિસાઇલ ફેક્ટરીઓને નિશાન બનાવીને ઈરાન પર લશ્કરી દબાણ જાળવી રાખ્યું છે. તેમના મતે, આ કાર્યવાહીને કારણે જ લાખો ઈઝરાયલી નાગરિકોને પરમાણુ વિનાશના ભયમાંથી બચાવી શકાયા છે.
સુરક્ષા ઝોન અને ભવિષ્યની રણનીતિ
નેતન્યાહૂએ એમ પણ સ્પષ્ટ કર્યું કે ગાઝા, લેબનોન અને સીરિયામાં જે સુરક્ષા ઝોન બનાવવામાં આવ્યા છે, ત્યાંથી ઈઝરાયલી સૈનિકો પાછા હટશે નહીં. તેમણે કહ્યું કે, "આ પ્રદેશોમાં અમે ઊંડો સુરક્ષા કવચ બનાવ્યો છે અને દેશની સુરક્ષા માટે જ્યાં સુધી જરૂર પડશે ત્યાં સુધી અમે ત્યાં હાજર રહીશું."
અમેરિકા સાથેની રાજદ્વારી વ્યૂહરચના અંગે ઉઠી રહ્યા છે પ્રશ્નો
નેતન્યાહૂનું આ નિવેદન એવા સમયે આવ્યું છે જ્યારે તેમના પર યુદ્ધ સંચાલન અને અમેરિકા સાથેની રાજદ્વારી વ્યૂહરચના અંગે પ્રશ્નો ઉઠી રહ્યા હતા. તેમણે પોતાના સંબોધન દ્વારા એ સંદેશ આપવાનો પ્રયાસ કર્યો છે કે ઈઝરાયલની સુરક્ષા માટે ગમે તેવા મોટા નિર્ણયો લેવા અને આંતરરાષ્ટ્રીય સ્તરે પોતાના મક્કમ સ્ટેન્ડ પર અડગ રહેવા તેઓ તૈયાર છે. આ ઘટનાક્રમ હવે આગળ જતાં મધ્ય પૂર્વની ભૌગોલિક રાજનીતિમાં કેવા બદલાવ લાવે છે, તે જોવું મહત્વનું રહેશે.
આ પણ વાંચોઃ Weather Update: આજે દિલ્હી સહિત અનેક રાજ્યોમાં વાવાઝોડાં સાથે ભારે વરસાદનું એલર્ટ,સાવચેત રહો!
