ઇઝરાયલ અને ઈરાન વચ્ચે ચાલી રહેલા યુદ્ધને હવે 6 દિવસ પૂરા થઈ ગયા છે. આ લડાઈનો પ્રભાવ માત્ર સૈન્ય સ્તર સુધી સીમિત નથી રહ્યો પરંતુ ઇઝરાયલના અર્થતંત્ર પર પણ ભારે અસર પડી રહી છે. ઇઝરાયલી નાણા મંત્રાલયે ચેતવણી આપી છે કે જો દેશભરમાં લાગેલા પ્રતિબંધો ચાલુ રહેશે તો અર્થતંત્રને દર અઠવાડિયે લગભગ 3 બિલિયન ડોલર એટલે કે આશરે 27,000 કરોડ રૂપિયાનું નુકસાન થઈ શકે છે.
દેશમાં આર્થિક પ્રવૃત્તિઓ
ઇઝરાયલ અને ઈરાન વચ્ચે વધતી જતી તણાવપૂર્ણ પરિસ્થિતિને કારણે દેશમાં ઘણી આર્થિક પ્રવૃત્તિઓ બંધ કરવી પડી છે. સરકાર દ્વારા સુરક્ષાને ધ્યાનમાં રાખીને અનેક કડક પગલાં લેવામાં આવ્યા છે, જેના કારણે વ્યવસાયો, શૈક્ષણિક સંસ્થાઓ અને ઘણી સેવાઓ પર અસર પડી છે.
પત્ર લખીને આર્થિક સ્થિતિ અંગે ચિંતા વ્યક્ત
ઇઝરાયલના નાણા મંત્રાલયના ડિરેક્ટર જનરલ ઇલાન રોમે હોમ ફ્રન્ટ કમાન્ડના વડા મેજર જનરલ શાઈ ક્લેપરને એક પત્ર લખીને આર્થિક સ્થિતિ અંગે ચિંતા વ્યક્ત કરી છે. પત્રમાં તેમણે જણાવ્યું કે જો દેશવ્યાપી પ્રતિબંધો લાંબા સમય સુધી ચાલુ રહેશે તો અર્થતંત્ર પર તેની ગંભીર અસર પડશે. તેમણે કહ્યું કે સુરક્ષા જાળવવી ખૂબ જ મહત્વપૂર્ણ છે, પરંતુ સાથે સાથે દેશની આર્થિક સ્થિતિને પણ ધ્યાનમાં લેવાની જરૂર છે. હાલમાં ઇઝરાયલનું અર્થતંત્ર પહેલાથી જ વધતી સુરક્ષા જરૂરિયાતો અને અગાઉના સંઘર્ષોના પરિણામે ભારે દબાણ હેઠળ છે.
અમેરિકાએ મળીને ઈરાન સામે સંયુક્ત હુમલો
શનિવારે ઇઝરાયલ અને અમેરિકાએ મળીને ઈરાન સામે સંયુક્ત હુમલો કર્યો હતો. ત્યારબાદ ઈરાને જવાબી કાર્યવાહી રૂપે મિસાઇલ હુમલાઓ શરૂ કર્યા. આ પરિસ્થિતિ બાદ ઇઝરાયલના IDF હોમ ફ્રન્ટ કમાન્ડે દેશભરમાં કડક માર્ગદર્શિકા જાહેર કરી હતી.
આવશ્યક સેવાઓ સિવાય તમામ કામકાજ
આ માર્ગદર્શિકા મુજબ આવશ્યક સેવાઓ સિવાય તમામ કામકાજ, શૈક્ષણિક પ્રવૃત્તિઓ અને ઘણા કાર્યસ્થળોને તાત્કાલિક બંધ કરવામાં આવ્યા. લોકોને ઓફિસ જવા પર પ્રતિબંધ મૂકવામાં આવ્યો છે અને કર્મચારીઓને ઘરેથી કામ કરવાની સલાહ આપવામાં આવી છે. સાથે જ દેશભરની શાળાઓ પણ બંધ રાખવામાં આવી છે. સોમવારે ફરીથી સુરક્ષા પરિસ્થિતિનું મૂલ્યાંકન કર્યા બાદ IDF હોમ ફ્રન્ટ કમાન્ડે આ પ્રતિબંધોને શનિવાર રાત સુધી લંબાવવાનો નિર્ણય લીધો હતો. આ પગલાંનો સીધો પ્રભાવ દેશના વેપાર, ઉદ્યોગ અને સેવાઓ પર પડ્યો છે.
લગભગ 9.4 બિલિયન ઇઝરાયલી શેકેલ
નાણા મંત્રાલયના અંદાજ મુજબ વર્તમાન પ્રતિબંધોના કારણે ઇઝરાયલના અર્થતંત્રને દર અઠવાડિયે લગભગ 9.4 બિલિયન ઇઝરાયલી શેકેલ (NIS)નું નુકસાન થઈ રહ્યું છે. તેમાં કાર્યસ્થળો બંધ રહેવા, શૈક્ષણિક સંસ્થાઓ બંધ રહેવા અને રિઝર્વ સૈનિકોની ગતિવિધિઓ જેવા કારણો સામેલ છે.
“ઓરેન્જ એલર્ટ લેવલ”
સરકાર હવે પ્રતિબંધોમાં થોડો ઘટાડો કરીને “ઓરેન્જ એલર્ટ લેવલ” લાગુ કરવાની વિચારણા કરી રહી છે. આ સ્તર હેઠળ સુરક્ષિત વિસ્તારોની નજીક આવેલા કેટલાક કાર્યસ્થળોને મર્યાદિત રીતે કાર્ય કરવાની મંજૂરી મળી શકે છે, જ્યારે શૈક્ષણિક સંસ્થાઓ હજુ બંધ જ રહેશે. વિશ્વ રાજકારણમાં વધતી તણાવભરી પરિસ્થિતિ વચ્ચે આ યુદ્ધનો પ્રભાવ માત્ર સૈન્ય ક્ષેત્ર પૂરતો જ નહીં પરંતુ અર્થતંત્ર અને સામાન્ય લોકોના જીવન પર પણ સ્પષ્ટ રીતે જોવા મળી રહ્યો છે.
આ પણ વાંચો : Iran Turkey missile issue : 'અમે કોઈ મિસાઇલ ચલાવી નથી', NATOની કાર્યવાહી બાદ ઈરાને સ્પષ્ટતા કરી
