છેલ્લા થોડા દિવસોમાં મધ્ય પૂર્વમાં તણાવ ખૂબ જ વધ્યો છે. આંતરરાષ્ટ્રીય અહેવાલો અનુસાર અમેરિકા અને ઇઝરાયલે ઈરાનની અંદર અનેક મહત્વપૂર્ણ સ્થળોને નિશાન બનાવી હુમલા કર્યા છે. કહેવાય છે કે એક અઠવાડિયાની અંદર લગભગ 7,000 જેટલા બોમ્બ ફેંકવામાં આવ્યા અને 360થી વધુ લક્ષ્યોને નિશાન બનાવવામાં આવ્યા.
વ્યૂહાત્મક સ્થળોને નિશાન
આ હુમલાઓમાં મુખ્યત્વે સૈન્ય ઠેકાણાં, મિસાઇલ લોંચ સાઇટ્સ અને અન્ય વ્યૂહાત્મક સ્થળોને નિશાન બનાવવામાં આવ્યા હોવાનું કહેવાય છે. પરંતુ કેટલાક અહેવાલોમાં એવું પણ કહેવામાં આવે છે કે હુમલાઓ દરમિયાન ઊર્જા માળખું, હોસ્પિટલો અને શાળાઓ જેવી નાગરિક સુવિધાઓને પણ નુકસાન થયું છે. જેના કારણે સમગ્ર વિશ્વમાં ચિંતા વધી છે. આ સમગ્ર ઘટનાક્રમને કારણે મધ્ય પૂર્વમાં રાજકીય અને સૈન્ય તણાવ વધુ ગાઢ બન્યો છે. ઘણા દેશો આ સ્થિતિને ખૂબ જ ગંભીરતાથી જોઈ રહ્યા છે અને સંભવિત મોટા સંઘર્ષની ભીતિ વ્યક્ત કરી રહ્યા છે.
નેતન્યાહૂનું નિવેદન
ઇઝરાયલના વડા પ્રધાન બેન્જામિન નેતન્યાહૂએ આ હુમલાઓ દરમિયાન જણાવ્યું હતું કે ઈરાનમાં “શાંતિપૂર્ણ અને સ્વતંત્ર રાજ્ય સ્થાપવાનું સમય આવી ગયો છે.” તેમણે ઈરાનના વિવિધ સમુદાયો જેમ કે પર્સિયન, કુર્દ, અઝેરી, બલુચી અને અહવાઝી લોકોને તેમની સરકાર સામે ઉભા રહેવાની અપીલ કરી. તેમનું કહેવું છે કે ઈરાનની હાલની સરકાર લોકો પર દમનકારી નીતિઓ અપનાવે છે અને દેશના નાગરિકોને વધુ સ્વતંત્રતા જોઈએ છે.
અમેરિકાનું સત્તાવાર વલણ
અમેરિકાની તરફથી કહેવામાં આવ્યું છે કે આ હુમલાઓનો મુખ્ય હેતુ ઈરાનના સૈન્ય ખતરાને ઓછો કરવાનો છે. ખાસ કરીને ઈરાનના મિસાઇલ કાર્યક્રમ, નૌકાદળ અને પરમાણુ કાર્યક્રમને કારણે મધ્ય પૂર્વમાં સુરક્ષાની સમસ્યા ઉભી થાય છે એવું અમેરિકાનું માનવું છે. વ્હાઇટ હાઉસે જણાવ્યું છે કે આ કાર્યવાહીનો હેતુ શાસન પરિવર્તન નથી પરંતુ સુરક્ષા ખતરાને કાબૂમાં લેવાનો છે. જોકે રાજકીય વિશ્લેષકો માને છે કે આ હુમલાઓથી ઈરાનની આંતરિક રાજનીતિમાં અસર પડી શકે છે.
ઈરાનની અંદરની સ્થિતિ
ઈરાનની રાજધાની તેહરાનમાં છેલ્લા કેટલાક વર્ષોમાં સરકાર વિરોધી પ્રદર્શન જોવા મળ્યા છે. ઘણા લોકો સરકારની નીતિઓ સામે અવાજ ઉઠાવી રહ્યા છે. પરંતુ સરકાર દ્વારા આવા પ્રદર્શનને ઘણી વખત કડક રીતે દબાવી દેવામાં આવ્યા હોવાનું અહેવાલોમાં જણાવાયું છે. કુર્દિશ વિસ્તારોમાં પણ લાંબા સમયથી વધુ અધિકારો અને સ્વાયત્તતા માટે માંગ ઉઠતી રહી છે. કેટલાક અહેવાલોમાં કહેવામાં આવ્યું છે કે કેટલાક વિસ્તારોમાં લોકો આ પરિસ્થિતિને અલગ રીતે જોઈ રહ્યા છે અને રાજકીય પરિવર્તનની આશા વ્યક્ત કરી રહ્યા છે.
મધ્ય પૂર્વ માટે શું અર્થ?
વિશેષજ્ઞો માને છે કે આ સમગ્ર પરિસ્થિતિ માત્ર ઈરાન સુધી મર્યાદિત નથી. તેનો પ્રભાવ સમગ્ર મધ્ય પૂર્વ અને વૈશ્વિક રાજકારણ પર પડી શકે છે. જો તણાવ વધુ વધે તો તે મોટા સૈન્ય સંઘર્ષમાં પણ ફેરવાઈ શકે છે. તેથી વિશ્વના ઘણા દેશો હાલમાં શાંતિ અને રાજનૈતિક વાતચીત દ્વારા સમસ્યાનો ઉકેલ લાવવાની માંગ કરી રહ્યા છે.
આ પણ વાંચો : Israel Iran War : ખામેનીના બંકર પર ઇઝરાયલનો હુમલો, 50 જેટ્સે 100 બોમ્બ ફેંક્યા
