ઇટાલીમાં ખરાબ હવામાન અને કુદરતી પ્રકોપે ભારે તારાજી સર્જી છે. ૨૧ ઓગસ્ટના રોજ ઇટાલીના ફોર્લી શહેરમાં આવેલા લુઇગી રિડોલ્ફી (Luigi Ridolfi) એરપોર્ટ પર ૧૨૦ કિલોમીટર પ્રતિ કલાકની ભયાનક ઝડપે એક તીવ્ર વાવાઝોડું ત્રાટક્યું હતું. પવનની આ અતિશય ગતિ એટલી પ્રચંડ હતી કે તેણે એરપોર્ટ પર ઊભેલા હળવા અને અલ્ટ્રાલાઇટ વિમાનોને પોતાના સ્થાન પરથી ઉખેડી નાખ્યા હતા. સોશિયલ મીડિયા પર વાયરલ થયેલા વીડિયોમાં ચારેય વિમાનો જોરદાર પવનના દબાણને કારણે હવામાં ઉછળતા, પલટી ખાતા અને જમીન પર પછડાતા સ્પષ્ટ નજરે પડે છે.
ભયાનક વાવાઝોડાંને કારણે સંચાલન ખોરવાયું
આ ભયાનક વાવાઝોડાને કારણે એરપોર્ટનું સંચાલન ખોરવાઈ ગયું હતું અને સલામતીના પગલા રૂપે તંત્ર દ્વારા એરપોર્ટને તાત્કાલિક ધોરણે આશરે એક કલાક સુધી બંધ રાખવું પડ્યું હતું. તોફાનના પ્રકોપથી માત્ર વિમાનો જ નહીં, પરંતુ એરપોર્ટની ઇમારતોને પણ વ્યાપક નુકસાન પહોંચ્યું હતું. પેસેન્જર લેન્ડિંગ એરિયા પાસે આવેલી છતનો મોટો ભાગ ઉડી ગયો હતો. પરિસ્થિતિની ગંભીરતાને જોઈને તાત્કાલિક બચાવ ટીમો અને ફાયર ફાઇટરોને ઘટનાસ્થળે તૈનાત કરવામાં આવ્યા હતા. રાહતની વાત એ રહી કે આ મોટી દુર્ઘટનામાં કોઈ જાનહાની કે ઈજાના અહેવાલ પ્રાપ્ત થયા નથી.
https://twitter.com/WeatherMonitors/status/2091370890860913030