જાપાનમાં ફરી એકવાર કુદરતી આફતે દસ્તક આપી છે. જાપાનના બોનિન ટાપુઓ વિસ્તારમાં રિક્ટર સ્કેલ પર 6.3 ની તીવ્રતાનો જોરદાર ભૂકંપ અનુભવાયો છે. જોકે, રાહતની વાત એ છે કે આ ઘટનામાં કોઈ મોટા નુકસાન કે જાનહાનિના તાત્કાલિક અહેવાલ મળ્યા નથી, પરંતુ સતત આવતા આંચકાઓને કારણે સ્થાનિક લોકોમાં ભારે ફાળ પડી છે. આ અગાઉ દક્ષિણ પેસિફિક મહાસાગરમાં આવેલા વનુઆતુ ટાપુ સમૂહમાં પણ 7.1 ની તીવ્રતાનો અત્યંત શક્તિશાળી ભૂકંપ નોંધાયો હતો.
ભૂકંપ પાછળનું વૈજ્ઞાનિક કારણ અને પ્લેટોનું ઘર્ષણ
પૃથ્વીના ભૂગર્ભમાં સાત મુખ્ય ટેક્ટોનિક પ્લેટો આવેલી છે, જે સતત ગતિશીલ રહે છે. જ્યારે આ પ્લેટો એકબીજા સાથે અથડાય છે, ત્યારે તે વિસ્તારને 'ફોલ્ટ ઝોન' કહેવામાં આવે છે. વારંવારની અથડામણ અને દબાણ વધવાના કારણે પ્લેટોના ખૂણા વળવા લાગે છે અને આખરે તૂટી જાય છે. આ પ્રક્રિયા દરમિયાન પૃથ્વીના ઊંડાણમાંથી વિપુલ પ્રમાણમાં ઊર્જા બહાર ફેંકાય છે, જે ભૂકંપ સ્વરૂપે સપાટી પર અનુભવાય છે. સામાન્ય રીતે 4.5 કે તેથી વધુ તીવ્રતાનો ભૂકંપ મકાનોને નુકસાન પહોંચાડી શકે છે, જ્યારે 7.0 થી વધુ તીવ્રતાનો ભૂકંપ વિનાશકારી સાબિત થાય છે.