Japan News:જાપાનમાં પાકિસ્તાની નાગરિકે મંજૂરી વગર મસ્જિદ બનાવતા તોડી પાડવાનો આદેશ

જાપાનના કાવાગોએ (Kawagoe) શહેરમાં 'જાપાન જામે મસ્જિદ રમઝાન' ના ગેરકાયદેસર નિર્માણને લઈને મોટો વિવાદ ઊભો થયો છે. સ્થાનિક વહીવટીતંત્રે સરકારી પરવાનગી વિના બનાવવામાં આવેલી આ મસ્જિદને તાત્કાલિક હટાવવાનો આદેશ આપ્યો છે. આ મામલો સામે આવ્યા બાદ જાપાન સ્થિત પાકિસ્તાની દૂતાવાસે પોતાના નાગરિકોને જાપાની કાયદાઓ અને નિયમોનું કડક પાલન કરવાની કડક સૂચના આપી છે. સ્થાનિક પ્રશાસનનું કહેવું છે કે આ મસ્જિદનું નિર્માણ જાપાની કાયદા હેઠળ જરૂરી મંજૂરી લીધા વિના સ્થાનિક નિયમોનું ઉલ્લંઘન કરીને એક પાકિસ્તાની નાગરિક દ્વારા કરવામાં આવ્યું હતું, જેને હવે હટાવી દેવામાં આવશે.

પાકિસ્તાની રાજદૂતે કર્યું હતું ઉદ્ઘાટન

મીડિયા રિપોર્ટ્સ અનુસાર, આ મસ્જિદને આ જ વર્ષે ૩ એપ્રિલના રોજ એક સમારોહ દરમિયાન ખુલ્લી મૂકવામાં આવી હતી. આ ઉદ્ઘાટન સમારોહમાં જાપાનમાં પાકિસ્તાનના રાજદૂત અબ્દુલ હમીદ પણ સામેલ થયા હતા અને તેમણે જ તેનું ઉદ્ઘાટન કર્યું હતું. જોકે, આ વિવાદ સામે આવ્યા બાદ પાકિસ્તાન સરકાર અને તેનું દૂતાવાસ હવે આ બાબતથી અંતર જાળવી રહ્યા છે. દૂતાવાસનો દાવો છે કે કાર્યક્રમમાં હાજરી આપતા પહેલા આયોજકો પાસેથી એવું આશ્વાસન લેવામાં આવ્યું હતું કે નિર્માણ માટે તમામ જરૂરી સરકારી પરવાનગીઓ મેળવી લેવામાં આવી છે.

ઑક્ટોબર ૨૦૨૪માં પ્રશાસનને ખબર પડી હતી

કાવાગોએ શહેરના અર્બન ડેવલપમેન્ટ ડિપાર્ટમેન્ટના જણાવ્યા અનુસાર, આ મસ્જિદ જે જમીન પર બનાવવામાં આવી છે તે 'અર્બનાઇઝેશન કંટ્રોલ ઝોન' હેઠળ આવે છે, જ્યાં કોઈપણ નિર્માણ માટે વિશેષ સરકારી મંજૂરી જરૂરી છે. પ્રશાસનને ઓક્ટોબર ૨૦૨૪માં આ ગેરકાયદેસર બાંધકામની જાણ થઈ હતી. તે સમયે ઇમારતનું બાહ્ય માળખું લગભગ તૈયાર થઈ ગયું હતું. પ્રશાસને તુરંત જ કામ રોકવાનો આદેશ આપ્યો હતો, પરંતુ કામદારોએ કથિત રીતે એવું કહીને કામ ચાલુ રાખ્યું હતું કે તેઓ જાપાની ભાષા સમજી શકતા નથી.

હવે તોડી પાડવાની પ્રક્રિયા શરૂ થશે

માર્ચ ૨૦૨૫માં આ જમીનની માલિકી એક પાકિસ્તાની નાગરિકની કંપનીને ટ્રાન્સફર કરવામાં આવી હતી. વહીવટીતંત્રે સ્પષ્ટ કર્યું છે કે માત્ર ધાર્મિક સ્થળ હોવાને કારણે કોઈ ગેરકાયદેસર બાંધકામને વિશેષ છૂટ આપી શકાય નહીં. હવે કંપનીએ પ્રશાસનને એક સુધારા યોજના સોંપી છે, જેમાં આ માળખું હટાવવાની પ્રક્રિયા શરૂ કરવાનું આશ્વાસન આપવામાં આવ્યું છે. બીજી તરફ, પાકિસ્તાની માલિકના પિતાએ જણાવ્યું છે કે જમીન ખરીદતા પહેલા જ આ ઇમારત ત્યાં હાજર હતી અને તેને તોડી પાડવામાં મોટો ખર્ચ થતો હોવાથી તેઓ હાલ નગરપાલિકા સાથે આગળની કાર્યવાહી અંગે ચર્ચા કરી રહ્યા છે.