ઉત્તરી જાપાન હાલમાં દાયકાઓની સૌથી ભયંકર હિમવર્ષાનો સામનો કરી રહ્યું છે. છેલ્લા 15 દિવસથી સતત પડી રહેલા બરફને કારણે અત્યાર સુધીમાં 35 લોકોએ પોતાના જીવ ગુમાવ્યા છે, જ્યારે 390થી વધુ લોકો ઈજાગ્રસ્ત થયા છે. આ કુદરતી આફતને કારણે અનેક શહેરો બરફની સફેદ ચાદર હેઠળ ઢંકાઈ ગયા છે, જેના કારણે તેને 'સફેદ મોત' તરીકે ઓળખવામાં આવી રહ્યું છે.
રેકોર્ડબ્રેક હિમવર્ષા અને જાનહાનિ
જાપાનના હવામાન વિભાગના જણાવ્યા અનુસાર, નિગાતા, અકિતા અને આઓમોરી જેવા પ્રીફેક્ટર્સમાં સૌથી વધુ અસર જોવા મળી છે. કેટલાક વિસ્તારોમાં 2 મીટર (આશરે 6.5 ફૂટ) સુધી બરફના થર જામી ગયા છે. આઓમોરીમાં 183 સેમી બરફ નોંધાયો છે, જે છેલ્લા 40 વર્ષનો સૌથી મોટો રેકોર્ડ છે. મોટાભાગના મોત ઘરની છત પરથી બરફ સાફ કરતી વખતે લપસી પડવાથી અથવા કાતિલ ઠંડીને કારણે હાર્ટએટેક થવાથી થયા છે.
ભૂસ્ખલન અને અકસ્માતનો ભય
ભારે હિમવર્ષા બાદ હવે તાપમાન વધવાની શક્યતાને પગલે તંત્રએ ભૂસ્ખલનની ગંભીર ચેતવણી આપી છે. બરફ ઓગળવાને કારણે રસ્તાઓ લપસણા બની રહ્યા છે અને પહાડી વિસ્તારોમાં માટી ધસી પડવાનો ભય છે. કેબિનેટ સચિવ મિનોરુ કિહારાએ નાગરિકોને સુરક્ષાના સાધનો અને હેલ્મેટ પહેરીને જ બરફ સાફ કરવાની સલાહ આપી છે.
બચાવ કામગીરી અને સેનાની મદદ
પરિસ્થિતિની ગંભીરતાને જોતા જાપાનની સેલ્ફ-ડિફેન્સ ફોર્સિસ (સેના) ને મેદાનમાં ઉતારવામાં આવી છે. સૈનિકો ફસાયેલા લોકોને બચાવવા, વીજ પુરવઠો પુનઃસ્થાપિત કરવા અને રસ્તાઓ પરથી બરફ હટાવવાની કામગીરી કરી રહ્યા છે. આગામી સપ્તાહમાં હજુ પણ વધુ હિમવર્ષાની આગાહી કરવામાં આવી છે, જેના કારણે વહીવટીતંત્રે લોકોને બિનજરૂરી બહાર ન નીકળવા અપીલ કરી છે.
આ પણ વાંચોઃ પ્રકાશન પહેલા જ કઈ રીતે રાહુલ ગાંધી પાસે પહોચી બુક? વિવાદની Inside Story
