લંડન સ્થિત ભારતીય હાઈકમિશને યુનાઇટેડ કિંગડમમાં ભારતના મુખ્ય ન્યાયાધીશ સૂર્યકાંતના એક કાર્યક્રમ દરમિયાન થયેલા હોબાળાની કડક શબ્દોમાં નિંદા કરી છે. CJI સૂર્યકાંત હાલમાં બ્રિટનના છ દિવસીય પ્રવાસે છે, જ્યાં તેઓ વિવિધ કાનૂની અને તકનીકી વિષયો પર પોતાના વિચારો શેર કરી રહ્યા છે.
AI અને કાયદા પર વૈશ્વિક ચર્ચા
ગુરુવારે લંડનની બર્કબેક યુનિવર્સિટીમાં આર્ટિફિશિયલ ઇન્ટેલિજન્સ (AI) અને આંતરરાષ્ટ્રીય કાયદા વિષય પર મુખ્ય ન્યાયાધીશનો કાર્યક્રમ યોજવામાં આવ્યો હતો. આ કાર્યક્રમનો મુખ્ય હેતુ AI, કાનૂની પ્રણાલીઓ અને આંતરરાષ્ટ્રીય ગવર્નન્સ વચ્ચે વધી રહેલા સંબંધોને સમજવા અને ભવિષ્યના પડકારો પર ચર્ચા કરવાનો હતો. ભાષણ પછી શ્રોતાઓ સાથે પ્રશ્નોત્તરીનું એક સત્ર ચાલી રહ્યું હતું, ત્યારે જ ત્યાં હાજર એક વ્યક્તિએ કાર્યક્રમમાં અવરોધ ઊભો કરવાનો પ્રયાસ કર્યો હતો.
અસંમતિના સવાલ પર વધ્યો વિવાદ
સોશિયલ મીડિયા પર સામે આવેલા વીડિયો અનુસાર, એક વ્યક્તિએ ભારતમાં અસંમતિ પ્રત્યે વધી રહેલી અસહિષ્ણુતાને લઈને સવાલ પૂછવાનો પ્રયત્ન કર્યો હતો. આ પછી ત્યાં તીખી ચર્ચા શરૂ થઈ ગઈ હતી. જો કે, કાર્યક્રમના મોડરેટરે તરત જ હસ્તક્ષેપ કરીને આ સવાલને અટકાવી દીધો અને સ્પષ્ટ કર્યું કે આ મુદ્દો એઆઈ અને આંતરરાષ્ટ્રીય કાયદાના નક્કી કરાયેલા વિષયથી બિલકુલ અલગ છે.
આ ઘટના પછી શુક્રવારે ભારતીય હાઈકમિશને સોશિયલ મીડિયા પર એક સત્તાવાર નિવેદન જાહેર કરીને આ પ્રકારના વર્તનને સંપૂર્ણપણે અસ્વીકાર્ય ગણાવ્યું છે. હાઈકમિશને જણાવ્યું કે કોઈ લોકતાંત્રિક સમાજમાં વિચારોની ભિન્નતા હોવી એ એક સ્વાભાવિક બાબત છે. જો કે, તેને હંમેશા એક સભ્ય અને સન્માનજનક રીતે વ્યક્ત કરવી જોઈએ. દર્શકોનું આ અશિષ્ટ વર્તન જાહેર સંવાદની મર્યાદાઓની બિલકુલ વિરુદ્ધ છે.
ટેકનોલોજી અને કાયદા પર CJIના વિચારો
પોતાના સંબોધન દરમિયાન CJI સૂર્યકાંતે ટેકનોલોજીના ઉપયોગ પર ઊંડી વાત કહી. તેમણે સ્પષ્ટ કર્યું કે ટેકનોલોજી પોતાની રીતે ન તો સંપૂર્ણપણે ફાયદાકારક છે અને ન તો નુકસાનકારક. આની સાચી અસર એ બાબત પર નિર્ભર કરે છે કે સમાજ તેને કયા કાનૂની, રાજકીય અને નૈતિક માપદંડો સાથે લાગુ કરે છે. કાયદાનું કામ તકનીકી પ્રગતિનો વિરોધ કરવાનું કે તેની સામે આંખો બંધ કરીને આત્મસમર્પણ કરવાનું નથી. પરંતુ, એ સુનિશ્ચિત કરવાનું છે કે ટેકનોલોજીની તાકાત હંમેશા બંધારણીય મૂલ્યો, લોકતાંત્રિક ગરિમા અને માનવાધિકારો પ્રત્યે જવાબદાર રહે.
ભારત-યુકે આર્થિક ભાગીદારી પર ભાર
શુક્રવારે પોતાના પ્રવાસને આગળ વધારતા મુખ્ય ન્યાયાધીશે ભારતીય મધ્યસ્થતા પરિષદની એક આંતરરાષ્ટ્રીય પરિષદનું ઉદ્ઘાટન પણ કર્યું હતું. 'ભારત-યુકે આર્થિક ભાગીદારીને મજબૂત કરવામાં વૈકલ્પિક વિવાદ નિવારણની ભૂમિકા' વિષય પર બોલતા તેમણે બંને દેશો વચ્ચે સહયોગ વધારવા પર ભાર મૂક્યો હતો. તેમણે કહ્યું, "આ સમયે દુનિયાને સરખામણીની નહીં, પરંતુ એકસાથે મળીને નિર્માણ કરવાની જરૂરિયાત છે."
આ પણ વાંચો-Uttarakhand : 'આ બાળક ને ટોપ મેજિશિયન્સમાં હોવું જોઈએ...' નૈનીતાલના નન્હે જાદૂગરના ફેન બન્યા આનંદ મહિન્દ્રા
