આજના સ્પર્ધાત્મક અને વ્યસ્ત સમયમાં માત્ર મોટા જ નહીં પરંતુ નાના બાળકો પણ અભ્યાસના ભાર અને ચિંતાનો ભોગ બનતા હોય છે. આ સમસ્યાને ધ્યાનમાં રાખીને અમેરિકાના રોડ આઇલેન્ડમાં આવેલી એક મિડલ સ્કૂલે વિદ્યાર્થીઓનો તણાવ અને ચિંતા ઘટાડવા માટે એક અનોખો અને સુંદર રસ્તો શોધી કાઢ્યો છે. આ શાળાએ સત્તાવાર રીતે 'પિનેકોન' નામની સાડા ત્રણ વર્ષની એક સુંદર બિલાડીને 'થેરાપી કેટ' તરીકે નિયુક્ત કરી છે. કલા શિક્ષક કેલી સ્મિથ આ બિલાડીને અઠવાડિયામાં ત્રણ દિવસ શાળામાં લાવે છે, જ્યાં તે વિદ્યાર્થીઓ માટે આશીર્વાદરૂપ સાબિત થઈ રહી છે.
પરીક્ષા પાસ કર્યા બાદ મળી શાળામાં પ્રવેશવાની મંજૂરી
શિક્ષક કેલી સ્મિથે સપ્ટેમ્બર ૨૦૨૫માં શાળા વહીવટીતંત્ર સમક્ષ આ પ્રસ્તાવ મૂક્યો હતો. ઘોંઘાટ અને ભીડભાડવાળા વાતાવરણમાં પણ શાંત રહેવાની કસોટી સફળતાપૂર્વક પાસ કર્યા બાદ, જાન્યુઆરી ૨૦૨૬માં પિનેકોનને સત્તાવાર રીતે શાળામાં આવવાની પરવાનગી આપવામાં આવી હતી. હવે આ બિલાડી પોતાનો મોટાભાગનો સમય આર્ટ રૂમમાં વિતાવે છે. વર્ગો વચ્ચેના વિરામ દરમિયાન પિનેકોન શાળાના કોરિડોરમાં આંટાફેરા મારે છે અને વિદ્યાર્થીઓના લોકર સુંઘે છે, જેને વિદ્યાર્થીઓ પ્રેમથી તેની સુરક્ષા ફરજ ગણાવે છે.