પાકિસ્તાનના ગેરકાયદે કબજા હેઠળના જમ્મુ-કાશ્મીર (PoK) માં પરિસ્થિતિ સતત વણસી રહી છે. ત્યાંના સ્થાનિક નાગરિકોના મૂળભૂત અધિકારો માટે થઈ રહેલા શાંતિપૂર્ણ પ્રદર્શનો પર પાકિસ્તાની સેના અને વહીવટીતંત્ર દ્વારા કરવામાં આવી રહેલા ક્રૂર દમનનો એક વીડિયો સોશિયલ મીડિયા પર વાયરલ થયો છે. આ હિંસા અને અત્યાચાર વચ્ચે, જમ્મુ-કાશ્મીર જોઈન્ટ અવામી એક્શન કમિટી (JAAC) ના મુખ્ય સભ્ય સરદાર અમન ખાને એક વીડિયો સંદેશ જાહેર કરીને 5 જુલાઈએ પાકિસ્તાન સરકાર અને સેના વિરુદ્ધ એક વિશાળ વિરોધ પ્રદર્શનનું આહવાન કર્યું છે. આ સાથે જ તેમણે ભારતના નાગરિકો, ખાસ કરીને શ્રીનગર અને કાશ્મીર ઘાટીના લોકો પાસે આ લડાઈમાં સમર્થન માંગ્યું છે.
"અમારા શ્વાસ લેવા પર પણ પહેરો લગાવાયો છે"
વાયરલ વીડિયોમાં JAAC ના નેતા સરદાર અમન ખાને પીઓકેની ગંભીર સ્થિતિનો ચિતાર આપતા જણાવ્યું છે કે, "આ સંદેશ દ્વારા હું કાશ્મીર ઘાટી, ખાસ કરીને શ્રીનગર, રાજૌરી, જમ્મુ, લદ્દાખ, કારગિલ અને ગિલગિટ-બાલ્ટિસ્તાનના લોકો સાથે વાત કરી રહ્યો છું. પાકિસ્તાની સેનાના દબાણ અને અત્યાચારનો સામનો કરતા આપણને એક મહિના જેટલો સમય થઈ ગયો છે. પોતાના મૂળભૂત અધિકારો માંગવા પર અહીંની જનતા સાથે જે જુલમ, અન્યાય અને સૈન્ય આક્રમકતા થઈ રહી છે, તે હવે ચરમસીમાએ પહોંચી ગઈ છે." તેમણે વધુમાં ગંભીર આક્ષેપ કર્યો હતો કે, મુશ્કેલ સમયમાં ખોરાક અને દવાઓનો પુરવઠો રોકી દેવામાં આવ્યો છે. પાકિસ્તાની શાસકો અને સુરક્ષા દળો હવે સ્થાનિક લોકોના શ્વાસ લેવા પર પણ સવાલો ઉઠાવી રહ્યા છે. આથી, તેમણે સરહદ પારના ભારતીય નાગરિકોને 5 જુલાઈના આ વિરોધ પ્રદર્શનને સમર્થન આપવા અપીલ કરી છે.
વિપક્ષી નેતાઓ પર પ્રતિબંધ અને આર્થિક નાકેબંધી
પીઓકેમાં લોકશાહીના અધિકારોને કચડી નાખવા માટે પાકિસ્તાન સરકાર તમામ હદો પાર કરી રહી છે. 30 જૂનના રોજ વિપક્ષી નેતાઓના એક પ્રતિનિધિમંડળને બળજબરીપૂર્વક PoK માં પ્રવેશતા રોકવામાં આવ્યો હતો, જેની જોઈન્ટ અવામી એક્શન કમિટીએ સખત શબ્દોમાં નિંદા કરી છે. આ ઉપરાંત, સમગ્ર વિસ્તારમાં ઈન્ટરનેટ સેવાઓ બંધ કરી દેવામાં આવી છે અને ખાદ્ય સામગ્રીનો પુરવઠો રોકીને સામાન્ય જનતાને હેરાન કરવામાં આવી રહી છે.
600થી વધુ કાર્યકરોને જેલમાં ધકેલી દેવાયા
પીઓકેના જાણીતા સામાજિક કાર્યકર્તા અમજદ અયૂબ મિર્ઝાના જણાવ્યા અનુસાર, JAAC ના અગ્રણી નેતા શૌકત નવાઝ મીરની ધરપકડ બાદ સ્થિતિ કલાક દર કલાકે વધુ બગડી રહી છે. અત્યાર સુધીમાં 600 થી વધુ સામાજિક કાર્યકરો અને સમિતિના સભ્યોની જેલમાં ધકેલી દેવામાં આવ્યા છે. મિર્ઝાએ જણાવ્યું કે, પાકિસ્તાન જે દિવસને 'કાશ્મીર એકતા દિવસ' તરીકે ઉજવતું હતું, તે 5 જુલાઈના દિવસને હવે પાકિસ્તાનના કાળા કરતૂતો વિરુદ્ધ 'વિરોધ દિવસ' તરીકે મનાવવામાં આવી રહ્યો છે. આ આંદોલનના સમર્થનમાં માત્ર પીઓકે જ નહીં, પરંતુ લંડનમાં પણ હજારો પ્રવાસી કાશ્મીરીઓ પાકિસ્તાની સેના વિરુદ્ધ એકઠા થઈ રહ્યા છે.
વિવાદનું અસલી કારણ શું છે?
આ સમગ્ર વિવાદના મૂળમાં પીઓકેની વિધાનસભામાં જમ્મુ-કાશ્મીરના શરણાર્થીઓ માટે અનામત રાખવામાં આવેલી 12 બેઠકો છે. સ્થાનિક નાગરિક સંગઠનોનો આરોપ છે કે ઈસ્લામાબાદ (પાકિસ્તાન સરકાર) આ બેઠકોનો દુરુપયોગ કરીને અહીંની ચૂંટણીઓમાં ગેરરીતિ કરે છે અને પોતાની કઠપૂતળી સરકાર સ્થાપિત કરે છે. આ રાજકીય દખલગીરી અને આર્થિક શોષણ સામે જનતાએ મોરચો માંડ્યો છે. પાકિસ્તાની સેના પ્રદર્શનકારીઓ પર નજર રાખવા માટે ડ્રોનનો ઉપયોગ કરી રહી છે, જેના વિરોધમાં પ્રદર્શનકારીઓએ આગામી 27 જુલાઈએ યોજાનારી સ્થાનિક પ્રાદેશિક ચૂંટણીઓનો સંપૂર્ણ બહિષ્કાર કરવાનું એલાન કર્યું છે. વૈશ્વિક સ્તરે એમ્નેસ્ટી ઇન્ટરનેશનલે પણ પાકિસ્તાનની આ હિંસક અને દમનકારી નીતિઓની આકરી ટીકા કરી છે.
આ પણ વાંચો:Strait Of Hormuzમાંથી પસાર થતા જહાજો પર ઈરાન વસૂલશે નવો ટેક્સ, મિત્ર દેશોને મળશે ખાસ છૂટછાટ
