પાકિસ્તાનના અશાંત પ્રાંત બલોચિસ્તાનમાં પ્રતિબંધિત સંગઠન બલોચ લિબરેશન આર્મી (BLA) એ ફરી એકવાર પાકિસ્તાની સેનાને મોટો ઝટકો આપ્યો છે. બલોચિસ્તાનના ગ્વાદર જિલ્લાના જીવાની વિસ્તારમાં આવેલા પાકિસ્તાન કોસ્ટ ગાર્ડના કડક સુરક્ષાવાળા કેમ્પ પર શુક્રવારે સાંજે એક ભયાનક આત્મઘાતીહુમલો કરવામાં આવ્યો હતો. BLA એ આ હુમલાની જવાબદારી સ્વીકારતા દાવો કર્યો છે કે આ ઓપરેશનમાં પાકિસ્તાની સુરક્ષા દળોના 30 થી વધુ જવાનો માર્યા ગયા છે અને અનેક જવાનો ઘાયલ થયા છે.

વિસ્ફોટકોથી ભરેલી ટ્રક કેમ્પમાં ઘુસાડી

મીડિયા રિપોર્ટ્સ અનુસાર, આ હુમલો શુક્રવારે સાંજે આશરે 6:32 વાગ્યે BLA ની કુખ્યાત અને વિશેષ આત્મઘાતી પાંખ 'મજીદ બ્રિગેડ' દ્વારા કરવામાં આવ્યો હતો. સંગઠનનો દાવો છે કે અત્તાઉલ્લાહ બલોચ ઉર્ફે અજમલ નામના આત્મઘાતી હુમલાખોરે વિસ્ફોટકોથી ભરેલી એક માઝદા ટ્રકને સીધી કોસ્ટ ગાર્ડના કેમ્પમાં ઘુસાડી દીધી હતી. વિસ્ફોટ એટલો શક્તિશાળી હતો કે તેનો અવાજ દૂર-દૂર સુધી સંભળાયો હતો અને આખો કેમ્પ મલબામાં ફેરવાઈ ગયો હતો. BLA ની મીડિયા વિંગ 'હક્કાલ' દ્વારા આ હુમલાનો એક 43 સેકન્ડનો વીડિયો પણ જાહેર કરવામાં આવ્યો છે, જેમાં ટ્રક કેમ્પમાં પ્રવેશતી જોવા મળે છે.

આત્મઘાતી વિસ્ફોટ બાદ સીધો જમીની હુમલો

BLA ના પ્રવક્તા જીયંદ બલોચે જણાવ્યું કે, વિસ્ફોટના તરત જ બાદ તેમની 'ફતેહ સ્ક્વોડ' ના લડવૈયાઓએ કેમ્પ પર ચારેય તરફથી જોરદાર જમીની હુમલો કર્યો હતો. કેમ્પમાં બચેલા પાકિસ્તાની સૈનિકો અને આતંકીઓ વચ્ચે આમને-સામને ભારે ગોળીબાર થયો હતો. BLA મુજબ મલબા નીચે દબાયેલા અને ઘાયલ સૈનિકોની સ્થિતિ જોતા મૃત્યુઆંક હજુ વધી શકે છે. સંગઠને ચેતવણી આપી છે કે જ્યાં સુધી બલોચિસ્તાનની સંપૂર્ણ આઝાદી નહીં મળે ત્યાં સુધી પાકિસ્તાની સૈન્ય સામે આ સશસ્ત્ર સંઘર્ષ આ જ તીવ્રતા સાથે ચાલુ રહેશે.

પાકિસ્તાન સરકાર અને સેનાની ચુપકીદી

આટલા મોટા હુમલા અને ભારે નુકસાનના દાવા છતાં પાકિસ્તાન સરકાર કે પાકિસ્તાની આર્મી (ISPR) તરફથી હજી સુધી કોઈ સત્તાવાર નિવેદન બહાર પાડવામાં આવ્યું નથી. પાકિસ્તાની તંત્ર સામાન્ય રીતે આવા હુમલાઓમાં પોતાના સૈનિકોના મોતના આંકડા છુપાવવા માટે જાણીતું છે, જેથી દેશમાં સેનાનું મનોબળ ન તૂટે. હાલ સમગ્ર વિસ્તારમાં તણાવપૂર્ણ માહોલ છે અને સર્ચ ઓપરેશન ચાલુ હોવાના અહેવાલો છે.

આ પણ વાંચો:Iran: ખામેનેઈની અંતિમ યાત્રામાં સાઉદી, ઓમાન અને કતાર ઉપસ્થિત, UAE અને બહરીનને ન મળ્યું આમંત્રણ?