અમેરિકાનું પ્રખ્યાત શેરબજાર નાસ્ડેક ટ્રેડિંગ ક્ષેત્રે એક મોટો અને ક્રાંતિકારી ફેરફાર લાવવાની તૈયારી કરી રહ્યું છે. વૈશ્વિક સ્તરે યુએસ ઇક્વિટીની વધી રહેલી માંગને પહોંચી વળવા માટે નાસ્ડેક અઠવાડિયાના પાંચેય કાર્યકારી દિવસોદરમિયાન દિવસના 23 કલાક ટ્રેડિંગ ચાલુ રાખવાની યોજના ઘડી રહ્યું છે. આ નવા પ્રસ્તાવ અનુસાર, ટ્રેડિંગ પ્રક્રિયા ચાલુ રાખવા માટે માત્ર એક જ કલાકનો બ્રેક રાખવામાં આવશે.
23 કલાક ટ્રેડિંગ પ્લાનની તૈયારીમાં અમેરિકા
પ્રસ્તાવિત સમયપત્રક મુજબ, રવિવાર રાત્રે 9 વાગ્યાથી શુક્રવારે રાત્રે 8 વાગ્યા સુધી ટ્રેડિંગ ચાલુ રહેશે. દરરોજ રાત્રે 8 વાગ્યાથી 9 વાગ્યા (ET) વચ્ચે એક કલાકનો વિરામ રાખવામાં આવશે, જે દિવસ ભરની પ્રક્રિયા પૂર્ણ કરવા અને આગામી ટ્રેડિંગ દિવસમાં સંક્રમણ કરવા માટે અત્યંત જરૂરી છે. જોકે, નાસ્ડેકનું નિયમિત સત્ર (સવારે 9:30 થી સાંજે 4 વાગ્યા સુધી) યથાવત રહેશે અને બજારમાં પારદર્શિતા જાળવવા માટે કિંમતો નક્કી કરવાનું કાર્ય ચાલુ રહેશે. આ વિસ્તૃત શેડ્યૂલમાં હાલના સમય ઉપરાંત રાત્રે 9 વાગ્યાથી સવારે 4 વાગ્યા સુધીનું એક નવું રાત્રિ ટ્રેડિંગ સત્ર પણ સામેલ કરવામાં આવશે.