નેપાળમાં અગાઉ હિમનદી ફાટવાને કારણે આવેલા વિનાશક પૂરની તારાજી હજુ ઓછી નથી થઈ, ત્યાં વધુ એક ગંભીર સંકટના વાદળો મંડરાઈ રહ્યા છે. ચીને નેપાળ સરકારને તાકીદની ચેતવણી જારી કરી છે કે લેંડે નદીના ઉપરના ભાગમાં કાટમાળ જમા થવાથી બનેલું કામચલાઉ (કુદરતી) તળાવ ગમે ત્યારે ફાટી શકે છે.
તળાવની ભયજનક સ્થિતિ અને ચીનની ચેતવણી
ચીની અધિકારીઓના જણાવ્યા મુજબ, આ કાટમાળવાળા તળાવમાં પાણીનો રંગ સતત ઘેરો અને કાળો થઈ રહ્યો છે, જે તેના તૂટવાના સ્પષ્ટ સંકેતો દર્શાવે છે. શુક્રવાર સુધીમાં આ તળાવમાં આશરે ૨.૫ મિલિયન ઘનમીટર પાણી એકઠું થઈ ચૂક્યું છે અને પાણીનું સ્તર સતત વધી રહ્યું છે. ચીનની ચોચેન નદી અને નેપાળની પુરેપુ નદીના સંગમ નજીક કાટમાળના કારણે આ સ્થિતિ સર્જાઈ છે. પાણી લેંડે ખોલા અને ત્રિશુલી નદીઓમાં ઓવરફ્લો થઈ રહ્યું છે. આ જોખમને ધ્યાનમાં રાખીને ચીન દ્વારા સેટેલાઇટ અને ડ્રોન દ્વારા આખા વિસ્તાર પર ચોવીસ કલાક નજર રાખવામાં આવી રહી છે તેમજ નીચાણવાળા વિસ્તારોને સતર્ક રહેવા જણાવ્યું છે.
ગુમ થયેલા ભારતીયો અને બચાવ કામગીરી
આ કુદરતી આપત્તિમાં મોટી સંખ્યામાં લોકો પ્રભાવિત થયા છે. ભારતના વિદેશ મંત્રાલયના જણાવ્યા અનુસાર, હજુ પણ ઓછામાં ઓછા ૩૨૦ ભારતીયો ગુમ છે, જ્યારે ૪૦૦ જેટલા લોકો ચીની ક્ષેત્રમાં ફસાયેલા હતા. રાહતની વાત એ છે કે ચીની ક્ષેત્રમાંથી ૯૬ ભારતીય નાગરિકો સુરક્ષિત રીતે રસ્તા માર્ગે નેપાળ પહોંચી ગયા છે અને ત્રિશુલી-૧ હાઇડ્રોઇલેક્ટ્રિક પ્રોજેક્ટમાં ફસાયેલા ૬૩ ભારતીયોને પણ સફળતાપૂર્વક બચાવી લેવાયા છે.
ભારત દ્વારા માનવતાવાદી સહાય
નેપાળની આ મુશ્કેલ પરિસ્થિતિમાં મિત્ર દેશ તરીકે ભારતે મદદનો હાથ લંબાવ્યો છે. બુધવાર રાતથી અત્યાર સુધીમાં ભારતે ત્રણ લશ્કરી પરિવહન વિમાનો દ્વારા ૬૭.૫ ટનથી વધુ કટોકટી રાહત પુરવઠો (જેમાં શુક્રવારે મોકલાયેલા ૧૦ ટનનો પણ સમાવેશ થાય છે) નેપાળ મોકલી આપ્યો છે. રાહત સામગ્રીની સાથોસાથ ભારતે ૧૧ સભ્યોની તબીબી અને પેરામેડિકલ ટીમ તેમજ સુરંગોમાં ફસાયેલા લોકોને બચાવવા માટે વિશેષ નિષ્ણાત ટીમ પણ મોકલી છે, જેથી બચાવ કામગીરીને વેગ મળી શકે.
આ પણ વાંચોઃ PM મોદી ઉઝબેકિસ્તાન જવા રવાના, SCO સમિટ અને દ્વિપક્ષીય બેઠકમાં આ મુદ્દે થશે ચર્ચા
