વૈશ્વિક સ્તરે તેલ અને ગેસના વધતા ભાવ અને હોર્મુઝની સામુદ્રધુનીમાં સર્જાયેલી અસ્થિરતા વચ્ચે ઇઝરાયલી વડાપ્રધાન બેન્જામિન નેતન્યાહૂએ વિશ્વને રાહત આપતા સમાચાર આપ્યા છે. 20 માર્ચ, 2026 ના રોજ યોજાયેલી પ્રેસ કોન્ફરન્સમાં તેમણે દાવો કર્યો હતો કે ઈરાન સાથેનું યુદ્ધ લોકોની ધારણા કરતા ઘણું વહેલું સમાપ્ત થઈ શકે છે. નેતન્યાહૂએ મક્કમતાથી જણાવ્યું કે ઈરાનની સૈન્ય અને પરમાણુ ક્ષમતા હવે પાયમાલ થઈ ચૂકી છે.
ઈરાની નેતૃત્વમાં શૂન્યાવકાશ અને નબળાઈ
નેતન્યાહૂએ ઈરાનના આંતરિક વહીવટ પર સવાલો ઉઠાવતા કહ્યું કે, હાલમાં તેહરાન પર કોનું શાસન છે તે જ અસ્પષ્ટ છે. આયાતુલ્લા ખામેનેઇના સંભવિત અનુગામી મોજતબા ખામેનેઇ હજુ સુધી જાહેરમાં આવ્યા નથી, જે ઈરાની શાસન વ્યવસ્થામાં સર્જાયેલા ઉચ્ચ સ્તરીય તણાવ અને વિખવાદનો સંકેત આપે છે. નેતન્યાહૂના મતે, ઈરાન હવે યુરેનિયમનું સંવર્ધન કરવા કે નવી બેલિસ્ટિક મિસાઈલો બનાવવા માટે સક્ષમ રહ્યું નથી, જેના કારણે તેના વિનાશની પ્રક્રિયા શરૂ થઈ ગઈ છે.
અમેરિકા અને ટ્રમ્પ સાથેનો સંબંધ
ઇઝરાયલ અમેરિકાને યુદ્ધમાં ખેંચી રહ્યું હોવાના આરોપોને નકારતા નેતન્યાહૂએ અમેરિકી પ્રમુખ ડોનાલ્ડ ટ્રમ્પનો બચાવ કર્યો હતો. તેમણે પ્રશ્ન કર્યો કે, "શું કોઈ ડોનાલ્ડ ટ્રમ્પને કહી શકે છે કે તેમણે શું કરવું જોઈએ?" તેમણે સ્પષ્ટ કર્યું કે ટ્રમ્પ હંમેશા અમેરિકાના હિતને સર્વોપરી રાખીને નિર્ણયો લે છે. જોકે, તેમણે સ્વીકાર્યું કે યુએસ અને ઇઝરાયેલી ગુપ્તચર એજન્સીઓ સહિયારા લક્ષ્યો પ્રાપ્ત કરવા માટે સાથે મળીને કામ કરી રહી છે.
હોર્મુઝ સ્ટ્રેટ અને વૈશ્વિક સુરક્ષા
હોર્મુઝની સામુદ્રધુનીમાં ઈરાન દ્વારા ઉભા કરવામાં આવેલા અવરોધો અંગે નેતન્યાહૂએ કહ્યું કે ઈરાન આંતરરાષ્ટ્રીય દરિયાઈ માર્ગો બંધ કરીને સમગ્ર વિશ્વને બ્લેકમેલ કરવાનો પ્રયાસ કરી રહ્યું છે, પરંતુ તેના આ પ્રયાસો ક્યારેય સફળ થશે નહીં. તેમણે ખુલાસો કર્યો કે ઇઝરાયલે ઈરાનના અસલુયે ગેસ કોમ્પ્લેક્સ પર સ્વતંત્ર રીતે હુમલો કર્યો હતો, પરંતુ ટ્રમ્પની વિનંતીને માન આપીને હાલમાં વધુ હુમલાઓ અટકાવવામાં આવ્યા છે.
આ પણ વાંચોઃ 5 વર્ષ સુધી ગેસ પુરવઠાની India પર પડી શકે છે અસર! કતારના ઉર્જા મંત્રીએ કર્યો ચોંકાવનારો ખુલાસો
