ન્યૂયોર્ક શહેરમાં રહેતા લાખો મધ્યમવર્ગીય અને શ્રમિક પરિવારો માટે રાહતના બહુ મોટા સમાચાર સામે આવ્યા છે. ન્યૂયોર્કના રેન્ટ ગાઇડલાઇન્સ બોર્ડે એક ઐતિહાસિક નિર્ણય લેતા આશરે 10 લાખ રેગ્યુલેટેડ એપાર્ટમેન્ટ્સના ભાડામાં આગામી બે વર્ષ સુધી કોઈ પણ પ્રકારનો વધારો ન કરવાનો નિર્ણય લીધો છે. ન્યૂયોર્કના નવનિયુક્ત મેયર ઝોહરાન મમદાનીએ પદ સંભાળ્યાના ગણતરીના મહિનાઓમાં જ પોતાના મુખ્ય ચૂંટણી વચનને પૂરું કરીને ભાડુઆતોને આ મોટી ભેટ આપી છે. મેયરે આ નિર્ણયને શહેરના શ્રમિકોની 'ઐતિહાસિક જીત' ગણાવી છે.
બોર્ડમાં 7-1થી પ્રસ્તાવ પાસ થયો
ગુરુવારે મેનહટનના એક મ્યુઝિયમ ઓડિટોરિયમમાં મળેલી હાઈ-વોલ્ટેજ બેઠકમાં 'રેન્ટ ગાઇડલાઇન્સ બોર્ડ' દ્વારા 7-1ની બહુમતીથી ભાડું ન વધારવાનો (ઝીરો ટકા વધારો) પ્રસ્તાવ મંજૂર કરવામાં આવ્યો હતો. આ નિર્ણય આગામી ઓક્ટોબર મહિનાથી શરૂ થનારી એક વર્ષ અને બે વર્ષની લીઝ માટે લાગુ થશે. આ નિર્ણય જાહેર થતાં જ ત્યાં હાજર સેંકડો ભાડુઆતો ખુશીથી ઝૂમી ઉઠ્યા હતા અને સીટીઓ વગાડીને નિર્ણયને આવકાર્યો હતો. ન્યૂયોર્કની લગભગ એકચોથાઈ વસ્તી આવા 'રેન્ટ-સ્ટેબિલાઇઝ્ડ' એપાર્ટમેન્ટ્સમાં રહે છે. વર્ષ 2025ના એક અભ્યાસ મુજબ, આ રેગ્યુલેટેડ એપાર્ટમેન્ટ્સનું સરેરાશ માસિક ભાડું $1,599 છે, જ્યારે સામાન્ય બજારમાં નવું ભાડું $3,950 જેટલું ઊંચું છે.
