દક્ષિણ નાઇજીરીયાના બેયલ્સા રાજ્યમાં એક અત્યંત કરૂણ જળ દુર્ઘટના સર્જાઈ છે, જેમાં અંતિમ સંસ્કારમાં હાજરી આપવા જઈ રહેલા લોકોની હોડી પલટી જતાં ઓછામાં ઓછા 24 લોકોના મોત થયા છે. નાઇજીરીયાની રાષ્ટ્રીય કટોકટી વ્યવસ્થાપન એજન્સી (NEMA) ના પ્રવક્તા માંજો એઝેકીએ સત્તાવાર નિવેદનમાં જણાવ્યું હતું કે, શુક્રવારે એક સમુદાયના લોકોને અંતિમ વિધિ માટે બીજા સમુદાયમાં લઈ જઈ રહેલી બોટ અચાનક રસ્તામાં જ ડૂબી ગઈ હતી. આ દુર્ઘટનાને પગલે સમગ્ર વિસ્તારમાં શોકનું મોજું ફરી વળ્યું છે.

દુર્ઘટનામાં 24 લોકોના મોત

ઘટનાની જાણ થતાં જ સ્થાનિક પ્રશાસન અને બચાવ દળો દ્વારા તાત્કાલિક શોધ અને બચાવ કામગીરી શરૂ કરવામાં આવી હતી. પોલીસ પ્રવક્તા મુસા મોહમ્મદે માહિતી આપતા જણાવ્યું હતું કે, બચાવ ટુકડીઓએ પાણીમાંથી અન્ય 24 મુસાફરોને સુરક્ષિત રીતે બચાવી લીધા છે અને તમામને તાત્કાલિક સારવાર માટે તબીબી સહાય પૂરી પાડવામાં આવી છે. જોકે, હોડીમાં કુલ કેટલા મુસાફરો સવાર હતા તે અંગે અધિકારીઓ દ્વારા હજુ સુધી કોઈ સ્પષ્ટ આંકડો જાહેર કરવામાં આવ્યો નથી, જેના કારણે હજુ પણ કેટલાક લોકો ગુમ હોવાની આશંકા સેવાઈ રહી છે અને શોધખોળ યથાવત રાખવામાં આવી છે.
https://x.com/MfonEkpeNkom/status/2123889248528978311?ref_src=twsrc%5Etfw%7Ctwcamp%5Etweetembed%7Ctwterm%5E2123889248528978311%7Ctwgr%5E%7Ctwcon%5Es1_c10&ref_url=

બોટમાં ટેકનિકલ ખામી સર્જાતા બની દુર્ઘટના

પોલીસની પ્રાથમિક તપાસમાં બહાર આવ્યું છે કે મુસાફરી દરમિયાન બોટમાં અચાનક કોઈ ટેકનિકલ ખામી સર્જાઈ હતી. જોખમનો અંદાજ આવી જતાં મુસાફરોએ બોટમેનને હોડી કિનારે લઈ લેવા માટે વિનંતી કરી હતી, પરંતુ તેણે મુસાફરોની વાત નકારી કાઢી હતી અને પરિણામે આ ગંભીર અકસ્માત સર્જાયો હતો. દુર્ઘટના બાદ બોટમેન ઘટનાસ્થળેથી ફરાર થઈ ગયો હોવાના અહેવાલ છે, જ્યારે પોલીસે કાર્યવાહી કરતા બોટ મેનેજરની ધરપકડ કરી વધુ તપાસ હાથ ધરી છે.

આ પહેલા પણ બની ચૂકી છે જીવલેણ ઘટનાઓ

આ ઘટના પર ઊંડું દુઃખ વ્યક્ત કરતા બેયલ્સા રાજ્ય સરકારે બોટ સંચાલકો અને મુસાફરોને સલામતીના નિયમોનું ચુસ્તપણે પાલન કરવા કડક અપીલ કરી છે. બેયલ્સાના માહિતી કમિશનર અબિયુવો કોકુ-ઓબાઇએ જણાવ્યું હતું કે, વધુ ઝડપ, ઓવરલોડિંગ, બેદરકારી અને લાઇફ જેકેટ વિના મુસાફરી કરવાનું તાત્કાલિક બંધ થવું જોઈએ, કારણ કે કોઈ પણ મુસાફરી માનવ જીવન કરતાં વધુ કિંમતી નથી. ઉલ્લેખનીય છે કે, નાઇજીરીયામાં સલામતીના નિયમોના અભાવ અને લાઇફ જેકેટ વગરની જૂની બોટોના કારણે અગાઉ પણ આવી અનેક જીવલેણ દુર્ઘટનાઓ બની ચૂકી છે.

આ પણ વાંચોઃ Weather Update: સાયક્લોન અકવાનનો કહેર, 24 થી 26 નવેમ્બર વચ્ચે અનેક રાજ્યોમાં ભારે વરસાદની ચેતવણી