અમેરિકાના ઉત્તર કેરોલિના રાજ્યમાંથી એક અત્યંત ચોંકાવનારી અને દુઃખદ ઘટના સામે આવી છે. અહીંના કાસવેલ કાઉન્ટી વિસ્તારમાં આવેલા એક ઘરમાં થયેલા આડેધડ ગોળીબારમાં 3 લોકોના કરુણ મોત નીપજ્યા છે, જ્યારે એક વ્યક્તિ ગંભીર રીતે ઘાયલ થતાં તેને તાત્કાલિક હોસ્પિટલમાં દાખલ કરવામાં આવ્યો છે. આ ભયાનક ઘટના બાદ સમગ્ર વિસ્તારમાં સન્નાટો અને શોકનો માહોલ છવાઈ ગયો છે. પ્રારંભિક અહેવાલો મુજબ, મૃતકોમાં આ ગોળીબાર કરનાર શંકાસ્પદ હુમલાખોર પોતે પણ સામેલ છે.
આડેધડ ફાયરિંગની ઘટના, અનેકના મોત
નોર્થ કેરોલિના સ્ટેટ બ્યુરો ઓફ ઇન્વેસ્ટિગેશન દ્વારા પ્રાપ્ત માહિતી અનુસાર, સ્થાનિક પોલીસને બુધવારે સવારે આશરે 8 વાગ્યાની આસપાસ એક નિવાસસ્થાનમાં ગોળીબાર થયા હોવાની સૂચના મળી હતી. આ માહિતી મળતાની સાથે જ સ્થાનિક પોલીસ અને કાઉન્ટી શેરિફ ઓફિસની ટીમો તાત્કાલિક ઘટનાસ્થળે દોડી ગઈ હતી. ઘરની અંદર તપાસ કરતા પોલીસ અધિકારીઓ પણ ચોંકી ઉઠ્યા હતા, કારણ કે અંદર ઘણા લોકો લોહીના ખાબોચિયામાં ઘાયલ હાલતમાં પડેલા જોવા મળ્યા હતા. તાત્કાલિક રાહત અને બચાવ કામગીરી હાથ ધરીને ઘાયલોમાંથી એક ગંભીર ઈજાગ્રસ્તને હોસ્પિટલ ખસેડવામાં આવ્યો હતો, જ્યારે અન્ય કેટલાક લોકોના ઘટનાસ્થળે જ પ્રાણપંખેરૂ ઉડી ગયા હતા.