ઉત્તર કોરિયાના રાજકીય ફલક પરથી મોટા સમાચાર સામે આવ્યા છે. શાસક 'વર્કર્સ પાર્ટી'એ તેની મહત્વપૂર્ણ પાર્ટી કોંગ્રેસમાં કિમ જોંગ ઉનને ફરી એકવાર સર્વસંમતિથી પક્ષના જનરલ સેક્રેટરી તરીકે ચૂંટી કાઢ્યા છે. સોમવાર, 23 ફેબ્રુઆરી 2026ના રોજ રાજ્ય મીડિયા દ્વારા કરવામાં આવેલી આ જાહેરાત સ્પષ્ટ કરે છે કે દેશમાં કિમ જોંગ ઉનની પકડ વધુ મજબૂત બની છે.
પાર્ટી કોંગ્રેસનું મહત્વ અને સર્વસંમતિ
ઉત્તર કોરિયામાં દર પાંચ વર્ષે યોજાતી આ પાર્ટી કોંગ્રેસ અત્યંત ગુપ્ત અને પ્રભાવશાળી ગણાય છે. રવિવારે કોંગ્રેસના ચોથા દિવસે, તમામ પ્રતિનિધિઓની "અટલ ઈચ્છાશક્તિ અને સર્વસંમતિ" સાથે કિમના નેતૃત્વ પર મહોર મારવામાં આવી હતી. અહેવાલો મુજબ, કિમ જોંગ ઉનના નેતૃત્વમાં દેશની પરમાણુ આધારિત યુદ્ધ-નિવારણ ક્ષમતામાં થયેલા નોંધપાત્ર વધારાને પક્ષે બિરદાવ્યો છે.
આર્થિક પડકારો અને કિમનો સ્વીકાર
આ બેઠક માત્ર સત્તાના પ્રદર્શન પૂરતી મર્યાદિત નથી, પરંતુ તે દેશના આવાસ, અર્થતંત્ર અને યુદ્ધ આયોજન માટેની દિશા પણ નક્કી કરે છે. કિમ જોંગ ઉને પોતાના સંબોધનમાં સ્વીકાર્યું હતું કે અર્થતંત્રને મજબૂત બનાવવું અને લોકોના જીવનધોરણમાં સુધારો કરવો એ પક્ષ માટે એક તાત્કાલિક ઐતિહાસિક કાર્ય છે.
કિમે લશ્કરી શક્તિની સાથે અર્થતંત્ર પર પણ ભાર મૂક્યો
ઉલ્લેખનીય છે કે, 2011માં સત્તા સંભાળ્યા બાદ કિમે લશ્કરી શક્તિની સાથે અર્થતંત્ર પર પણ ભાર મૂક્યો છે. ૨૦૨૧ની કોંગ્રેસમાં તેમણે આર્થિક વિકાસમાં થયેલી ભૂલોનો દુર્લભ સ્વીકાર કર્યો હતો, જે દર્શાવે છે કે આંતરરાષ્ટ્રીય પ્રતિબંધોની ઉત્તર કોરિયા પર ઊંડી અસર પડી છે.
પરમાણુ કાર્યક્રમ અને પક્ષના નિયમોમાં ફેરફાર
આ વર્ષની કોંગ્રેસમાં કિમે જાહેરાત કરી છે કે દેશના પરમાણુ શસ્ત્રો કાર્યક્રમનો આગામી તબક્કો ટૂંક સમયમાં શરૂ કરવામાં આવશે. સાથોસાથ, પક્ષની એકતા અને શિસ્તને વધુ કડક બનાવવા માટે પક્ષના નિયમોમાં પણ સુધારા કરવામાં આવ્યા છે.
આ પણ વાંચોઃ US: મેક્સિકોમાં ડ્રગ માફિયાના મોત બાદ ભડકી હિંસા, અનેક ફ્લાઇટ્સ રદ્દ, ભારતીયો માટે એડવાઇઝરી જાહેર
