દુબઈથી તેલ અવીવ જતી ફ્લાયદુબઈની ફ્લાઇટ FZ1073 પર થયેલા હાઇજેક અને ક્રેશ કરવાના ગંભીર પ્રયાસ પાછળના ઓમાની પાઇલટ વિશે પ્રાથમિક માહિતી સામે આવી છે. પ્રાપ્ત અહેવાલો મુજબ, આ ઓમાની પાઇલટ ઘટનાના લગભગ આઠ મહિના પહેલા જ દુબઈ સ્થિત એરલાઇન ફ્લાયદુબઈમાં જોડાયો હતો. આ સમયગાળો એવો હતો જ્યારે અમેરિકા અને ઇઝરાયલે સંયુક્ત રીતે ઇરાન પર હુમલો કર્યો હતો. જોકે, આ પાઇલટના કૃત્ય પાછળ ઇરાનનો કે કોઈ અન્ય સંગઠનનો હાથ હતો કે નહીં તે અંગે હજુ સુધી સત્તાવાર રહસ્ય યથાવત છે અને સઘન તપાસ ચાલી રહી છે.
કો પાયલટે કર્યો હુમલો
ઘટનાની વિગતો અનુસાર, 30 સપ્ટેમ્બરના રોજ જ્યારે આ પેસેન્જર વિમાન તેલ અવીવથી દુબઈ તરફ ઉડાન ભરી રહ્યું હતું, ત્યારે જોર્ડન ઉપર તેના સંતુલનમાં ગરબડ સર્જાઈ હતી. એટીસી (ATC) ને પહેલા 7700 અને ત્યારબાદ 7500 ના ઇમરજન્સી સિગ્નલ મળ્યા હતા, જે વિમાન હાઇજેક થવાના સંકેત આપતા હતા. પ્રત્યક્ષદર્શીઓ અને સાથી પાઇલટ્સના જણાવ્યા અનુસાર, કોકપીટની અંદર ઓમાની પાઇલટ વિમાનને ક્રેશ કરવાનો પ્રયાસ કરી રહ્યો હતો, પરંતુ ભારતીય પાઇલટ સ્મિત માછરે સમયસૂચકતા દાખવીને તેને રોકવાનો પ્રયાસ કર્યો હતો, જેના કારણે બંને વચ્ચે હિંસક ઝપાઝપી થઈ હતી.