પાકિસ્તાન અને અફઘાનિસ્તાન વચ્ચેના સંબંધોમાં અત્યાર સુધીનો સૌથી મોટો વળાંક આવ્યો છે. પાકિસ્તાની વાયુસેનાએ અફઘાનિસ્તાનની સરહદની અંદર ઘૂસીને કરેલા ભીષણ હવાઈ હુમલામાં 80 થી વધુ આતંકવાદીઓ માર્યા ગયા હોવાનો દાવો કરવામાં આવ્યો છે. આ હુમલા બાદ અફઘાનિસ્તાનમાં સત્તા પર રહેલા તાલિબાન શાસને પાકિસ્તાનને ગંભીર પરિણામો ભોગવવાની ખુલ્લી ચેતવણી આપી છે, જેનાથી દક્ષિણ એશિયામાં અસ્થિરતાનો ભય વધી ગયો છે.
ક્યાં અને કેવી રીતે થયો હુમલો?
પાકિસ્તાની ગુપ્તચર એજન્સીઓના ચોક્કસ ઇનપુટ્સના આધારે, વાયુસેનાએ અફઘાનિસ્તાનના નંગરહાર, પક્તિકા અને ખોસ્ત પ્રાંતોમાં સર્જિકલ સ્ટ્રાઈક જેવી કાર્યવાહી હાથ ધરી હતી. આ વિસ્તારોમાં પ્રતિબંધિત સંગઠન તહરીક-એ-તાલિબાન પાકિસ્તાનના સાત મુખ્ય ઠેકાણાઓને નિશાન બનાવવામાં આવ્યા હતા. પાકિસ્તાની સુરક્ષા સૂત્રોના જણાવ્યા અનુસાર, આ હુમલામાં TTP ના અનેક કમાન્ડરો સહિત 80 થી વધુ લડવૈયાઓ ઠાર થયા છે. પાકિસ્તાન આ આતંકવાદીઓને 'ફિત્ના અલ-ખ્વારિજ' તરીકે ઓળખાવે છે.
તાલિબાનનો રોષ અને સાર્વભૌમત્વનો મુદ્દો
તાલિબાન સરકારે આ હવાઈ હુમલાને અફઘાનિસ્તાનની પ્રાદેશિક અખંડિતતા અને સાર્વભૌમત્વનું સીધું ઉલ્લંઘન ગણાવ્યું છે. અફઘાન સંરક્ષણ મંત્રાલયે એક નિવેદન જારી કરીને કહ્યું છે કે પાકિસ્તાને રહેણાંક વિસ્તારો અને ધાર્મિક સ્થળોને નિશાન બનાવ્યા છે, જેમાં નિર્દોષ નાગરિકોને પણ નુકસાન થયું છે. તાલિબાન પ્રવક્તાએ આક્રમક તેવરમાં જણાવ્યું કે, "અફઘાનિસ્તાન ક્યારેય પોતાની ધરતી પર હુમલા સહન કરતું નથી અને અમે આ કાયરતાપૂર્ણ કૃત્યનો યોગ્ય સમયે વળતો જવાબ આપીશું."
સંઘર્ષનું મૂળ: TTP અને વધતો આતંકવાદ
આ વિવાદનું મુખ્ય કેન્દ્ર TTP (પાકિસ્તાની તાલિબાન) છે. 2021 માં જ્યારે અફઘાનિસ્તાનમાં તાલિબાન સત્તા પર આવ્યા, ત્યારે પાકિસ્તાનને આશા હતી કે સરહદ શાંત રહેશે. પરંતુ તેનાથી વિપરીત, પાકિસ્તાનમાં આતંકવાદી હુમલાઓમાં 70% નો ધરખમ વધારો જોવા મળ્યો છે. પાકિસ્તાન સતત આરોપ લગાવતું રહ્યું છે કે અફઘાન તાલિબાન TTP ને રક્ષણ અને તાલીમ આપે છે. બીજી તરફ, અફઘાન તાલિબાન આ આરોપોને નકારી રહ્યું છે અને પાકિસ્તાનની સુરક્ષા નિષ્ફળતાને તેમની આંતરિક સમસ્યા ગણાવે છે.
આ પણ વાંચોઃ Operation Sindoor પછી ભારતની ફાઈનલ તૈયારી, એક જ ક્લિકમાં ઈસ્લામાબાદ સાફ?
