પાકિસ્તાનનું આર્થિક પાટનગર ગણાતું કરાચી શહેર ફરી એકવાર ભયાનક આતંકી હુમલાથી હચમચી ઉઠ્યું છે. કરાચીના ગીચ વસ્તીવાળા ગુલિસ્તાન-એ-જૌહર વિસ્તારમાં આવેલા અર્ધલશ્કરી દળ 'સિંધ રેન્જર્સ' (Sindh Rangers) ના પ્રાદેશિક મુખ્યાલય પર આતંકવાદીઓએ આત્મઘાતી હુમલો કર્યો હતો. આ હુમલામાં પાકિસ્તાની સેનાના ૩ જવાનો માર્યા ગયા છે અને ૪ લોકો ગંભીર રીતે ઘાયલ થયા છે. જવાબી કાર્યવાહીમાં સુરક્ષા દળોએ ૩ આતંકવાદીઓને ઠાર કર્યા હતા, જ્યારે એક ઘાયલ આતંકીની ધરપકડ કરવામાં આવી છે. આ ઘટના બાદ હંમેશાની જેમ પાકિસ્તાને પોતાની સુરક્ષા ખામીઓ છુપાવવા માટે ભારતની ગુપ્તચર એજન્સીઓ પર આંગળી ચીંધી છે.
વિસ્ફોટકોથી ભરેલી કાર લઈને ઘૂસ્યા આતંકીઓ
સ્થાનિક અહેવાલો અને સત્તાવાર સૂત્રોના જણાવ્યા અનુસાર, શનિવારે રાત્રે આતંકવાદીઓએ વિસ્ફોટકોથી ભરેલી કાર રેન્જર્સના કમ્પાઉન્ડની દીવાલ સાથે ભટકાવી દીધી હતી. વિસ્ફોટ એટલો શક્તિશાળી હતો કે તેનો અવાજ કેટલાય કિલોમીટર દૂર સુધી સંભળાયો હતો. બ્લાસ્ટ બાદ આતંકીઓએ કમ્પાઉન્ડમાં ઘૂસીને અંધાધૂંધ ફાયરિંગ શરૂ કરી દીધું હતું. આશરે ૯૦ મિનિટ સુધી ચાલેલી આ અથડામણમાં સ્પેશિયલ સિક્યોરિટી યુનિટ (SSU) ના કમાન્ડોએ મોરચો સંભાળીને આતંકીઓનો સફાયો કર્યો હતો. આ હુમલાની જવાબદારી પ્રતિબંધિત સંગઠન તેહરીક-એ-તાલીબાન પાકિસ્તાન (TTP) ના અલગ થયેલા જૂથ 'જમાત-ઉલ-અહરાર' (Jamaat-ul-Ahrar) દ્વારા લેવામાં આવી છે.
