કેરેબિયન દેશ ડોમિનિકન રિપબ્લિકમાં રવિવાર, ૭ જૂનના રોજ એક અત્યંત હૃદયદ્રાવક ઘટના બની હતી, જેમાં એક ખાનગી વિમાન રનવે પર ક્રેશ થતા બે પાઇલટના મોત થયા છે. આ દુર્ઘટના પૂર્વી ડોમિનિકન રિપબ્લિકના જાણીતા 'લા રોમાના આંતરરાષ્ટ્રીય વિમાનમથક' પર બની હતી, જેના પગલે સમગ્ર દેશમાં શોકની લાગણી પ્રસરી ગઈ છે.


એરપોર્ટ પર લેન્ડિંગ સમયે બની આ ઘટના

પ્રાપ્ત માહિતી અનુસાર, આ ખાનગી વિમાન જ્યારે લા રોમાના એરપોર્ટ પર લેન્ડિંગ કરી રહ્યું હતું, ત્યારે અચાનક તે નિયંત્રણ ગુમાવી બેઠું હતું. રનવે પર લેન્ડ થતી વખતે વિમાનમાં ટેકનિકલ ખામી સર્જાઈ હોવાની શક્યતા છે, જેના કારણે તે તરત જ ક્રેશ થયું હતું અને આગના ગોળામાં ફેરવાઈ ગયું હતું. વિસ્ફોટ એટલો શક્તિશાળી હતો કે ધુમાડાના કાળા ગોટા આસપાસના વિસ્તારમાં ફેલાઈ ગયા હતા. સોશિયલ મીડિયા પર વાયરલ થયેલા દ્રશ્યોમાં વિમાનનો પાછળનો ભાગ (પૂંછડીનો ભાગ) રનવે પર આકાશ તરફ ઊંચો થયેલો જોઈ શકાય છે, ત્યારબાદ થયેલા વિસ્ફોટે ત્યાં હાજર લોકોમાં ભય પેદા કર્યો હતો.

બચાવ કામગીરી અને જાનહાનિ

અકસ્માતની જાણ થતા જ એરપોર્ટ પર દોડધામ મચી ગઈ હતી. ત્વરિત ગતિએ બચાવ ટીમો અને ફાયર એન્જિનોને ઘટનાસ્થળે મોકલવામાં આવ્યા હતા. અગ્નિશામકોએ ભારે જહેમત બાદ વિમાનમાં લાગેલી ભયાનક આગ પર કાબૂ મેળવ્યો હતો, પરંતુ તે પહેલા જ વિમાનમાં સવાર પાઇલટ અને સહ-પાઇલટના ઘટનાસ્થળે જ કમકમાટીભર્યા મોત થયા હતા. દેશની રાષ્ટ્રીય ઉડ્ડયન સત્તામંડળે આ દુર્ઘટનાની પુષ્ટિ કરતા ઊંડો શોક વ્યક્ત કર્યો છે.

પર્યટન ક્ષેત્ર અને ભૂતકાળના અકસ્માતો

લા રોમાના શહેર તેના પ્રવાસન ઉદ્યોગ માટે જાણીતું છે, જે ડોમિનિકન રિપબ્લિકના અર્થતંત્ર માટે ખૂબ મહત્વનું છે. આ પ્રકારના અકસ્માતો દેશની સુરક્ષા વ્યવસ્થા પર પણ સવાલો ઉભા કરે છે. નોંધનીય છે કે, ૨૦૨૧માં પણ રાજધાની સાન્ટો ડોમિંગોના લાસ અમેરિકાસ આંતરરાષ્ટ્રીય એરપોર્ટ પર એક ખાનગી વિમાન દુર્ઘટનામાં નવ લોકોએ પોતાના જીવ ગુમાવ્યા હતા.

આ પણ વાંચોઃ વીજળી વગર ચાલતુ હતુ પહેલું ફ્રીજ! જાણો કોણે અને કેવી રીતે બનાવ્યું હતુ?

  • Follow us on: