યમનમાં ચાલી રહેલા સંઘર્ષ વચ્ચે સાઉદી અરેબિયા દ્વારા કરવામાં આવેલા ભયાનક હવાઈ હુમલામાં 33 લોકોના મોત થયા છે અને ૩૯થી વધુ લોકો ગંભીર રીતે ઘાયલ થયા છે. મૃતકો અને ઘાયલોમાં મોટાભાગના નિર્દોષ મહિલાઓ અને બાળકો સામેલ છે. હુથી-નિયંત્રિત સમાચાર એજન્સી 'સબા' અને યમનના આરોગ્ય મંત્રાલય દ્વારા મળતી માહિતી અનુસાર, રોઇટર્સે અહેવાલ આપ્યો છે કે સાઉદી અરેબિયાએ યમનની રાજધાની સનાની પૂર્વમાં આવેલા અને હુથી બળવાખોરોનો ગઢ ગણાતા 'બાની હુશૈશ' ગામમાં આ એરસ્ટ્રાઈક કરી હતી.
યમનમાં ભયાનક હવાઇ હુમલો
આ હુમલામાં અનેક રહેણાંક ઘરોને સીધા નિશાન બનાવવામાં આવ્યા હતા, જેના કારણે અનેક નિર્દોષ નાગરિકો કાટમાળ નીચે દટાઈ ગયા હતા. જુલાઈમાં સાઉદી અરેબિયા અને હુથી બળવાખોરો વચ્ચે ફરીથી સંઘર્ષ શરૂ થયા બાદ આ અત્યાર સુધીનો સૌથી ઘાતક અને વિનાશક હુમલો માનવામાં આવે છે. સનાની સેહતુના હોસ્પિટલના ડિરેક્ટર અબ્દુલ-અઝીઝ અલ-દૈલામીએ જણાવ્યું હતું કે બચાવ ટીમ જ્યારે પણ ફસાયેલા લોકોને બહાર કાઢવા પહોંચે છે, ત્યારે સાઉદી બળો દ્વારા ફરીથી બીજો હુમલો કરવામાં આવે છે, જેના કારણે કેટલાક તબીબી અને બચાવ કાર્યકરોએ પણ પોતાના જીવ ગુમાવ્યા છે. હોસ્પિટલમાં દાખલ કરાયેલા ઘાયલોની હાલત અત્યંત નાજુક છે. દરમિયાન, સાઉદી અરેબિયાના સેન્ટર ફોર ઇન્ટરનેશનલ કોમ્યુનિકેશને આ ઘટના અંગે તપાસ હાથ ધરી હોવાનું નિવેદન આપ્યું છે.
https://x.com/HussainBukhaiti/status/2119110204365455429?ref_src=twsrc%5Etfw%7Ctwcamp%5Etweetembed%7Ctwterm%5E2119110204365455429%7Ctwgr%5E%7Ctwcon%5Es1_c10&ref_url=