થાઈલેન્ડના બેંગકોકમાં શનિવારે એક ભયાનક અકસ્માત સર્જાયો. શહેરના રેલવે ક્રોસિંગ પાસે એક માલગાડીએ બસને જોરદાર ટક્કર મારતા ઓછામાં ઓછા 8 લોકોના મોત થયા હોવાની જાણકારી મળી રહી છે, જ્યારે 20થી વધુ લોકો ઘાયલ થયા હોવાનું સામે આવ્યું છે. આ દુર્ઘટના બપોર બાદ મધ્ય વિસ્તારના એરપોર્ટ રેલ લિંક સ્ટેશન નજીક બની.

રેલવે ક્રોસિંગ પર વાહનોની લાંબી લાઈન ઉભી હતી

મળતી માહિતી મુજબ રેલવે ક્રોસિંગ પર વાહનોની લાંબી લાઈન ઉભી હતી, ત્યારે અચાનક ઝડપથી આવી રહેલી માલગાડીએ આગળ ઉભેલી નારંગી રંગની બસને ટક્કર મારી હતી. અકસ્માતનો વીડિયો સોશિયલ મીડિયા પર વાયરલ થયો છે, જેમાં ટક્કર બાદ બસ અને અન્ય વાહનો પાટા પર ઘસડાતા જોવા મળે છે. પ્રત્યક્ષદર્શીઓના જણાવ્યા મુજબ ટક્કર એટલી ભયાનક હતી કે બસમાં આગ લાગી ગઈ હતી અને નજીકની અનેક બાઈકો તથા લોકો રસ્તા પર ફંગોળાઈ ગયા હતા.

રાહત અને બચાવ કામગીરી શરૂ કરવામાં આવી

આગ પર કાબૂ મેળવ્યા બાદ બચાવકર્મીઓ સળગી ગયેલી બસની અંદર પ્રવેશતા વીડિયોમાં જોવા મળ્યા હતા. દુર્ઘટના બાદ તરત જ રાહત અને બચાવ કામગીરી શરૂ કરવામાં આવી હતી. તમામ ઘાયલોને નજીકની હોસ્પિટલમાં ખસેડવામાં આવ્યા છે. અધિકારીઓએ અકસ્માતના ચોક્કસ કારણોની તપાસ શરૂ કરી છે. સ્થાનિક લોકોના કહેવા મુજબ ટક્કર એટલી અચાનક અને જોરદાર હતી કે બસમાં બેઠેલા લોકોને બહાર નીકળવાની તક પણ મળી નહોતી.

આ પણ વાંચો : Americaના વિદેશ મંત્રી માર્કો રૂબિયો આગામી અઠવાડિયે આવશે ભારતના પ્રવાસે, જાણો કારણ