ડોનાલ્ડ ટ્રમ્પના જર્મનીમાંથી અમેરિકી સૈનિકો હટાવવાના નિવેદનથી પેન્ટાગોન અને યુરોપમાં ચિંતા વધી ગઈ છે. આ નિર્ણયની અગાઉ કોઈ યોજના નહોતી. જર્મનીમાં 35 થી 40 હજાર સૈનિકો તૈનાત છે, જે NATO (નાટો) માટે અત્યંત મહત્વના છે. નિષ્ણાતોના મતે, સૈનિકોને હટાવવા જોખમી સાબિત થઈ શકે છે, કારણ કે પેન્ટાગોન તેની યુરોપિયન અને આફ્રિકન કમાન્ડનું સંચાલન પણ જર્મનીથી જ કરે છે.
અમેરિકી રાષ્ટ્રપતિ ડોનાલ્ડ ટ્રમ્પના એક નિવેદનથી અમેરિકી રક્ષા મંત્રાલય 'પેન્ટાગોન'માં હલચલ મચી ગઈ છે. ટ્રમ્પે કહ્યું છે કે તેઓ જર્મનીમાંથી અમેરિકી સૈનિકોની સંખ્યા ઘટાડવા અથવા તેમને પાછા બોલાવવા પર વિચાર કરી રહ્યા છે. આ નિવેદનથી અધિકારીઓ આશ્ચર્યચકિત છે, કારણ કે તેમને અગાઉથી આવી કોઈ યોજનાની જાણકારી નહોતી. એવું જણાવવામાં આવ્યું છે કે ટ્રમ્પની સોશિયલ મીડિયા પોસ્ટ પછી જ ઘણા રક્ષા અધિકારીઓને આ સંભવિત નિર્ણયની ખબર પડી. આ બાબત એટલા માટે પણ ચોંકાવનારી છે કારણ કે તાજેતરમાં જ પેન્ટાગોને વિશ્વભરમાં તૈનાત અમેરિકી સૈનિકોની સમીક્ષા કરી હતી, જેમાં યુરોપમાંથી સૈનિકો હટાવવાની કોઈ મોટી યોજના નહોતી.
રશિયા સામે પશ્ચિમી દેશોની તાકાત નબળી પડશે
અધિકારીઓનું કહેવું છે કે પેન્ટાગોન આ પ્રકારની વાપસી માટે તૈયારી કરી રહ્યું નહોતું. પરંતુ ટ્રમ્પના અગાઉના નિર્ણયોને જોતા હવે આ બાબતે ગંભીરતાથી વિચાર કરવો પડી રહ્યો છે. આ પહેલા 2020માં પણ ટ્રમ્પે જર્મનીમાંથી 12,000 સૈનિકો હટાવવાનો આદેશ આપ્યો હતો, પરંતુ તેનો અમલ થઈ શક્યો નહોતો.ટ્રમ્પના આ નિવેદનથી યુરોપમાં પણ ચિંતા વધી ગઈ છે. જર્મનીમાં હાલમાં લગભગ 35,000 થી 40,000 અમેરિકી સૈનિકો તૈનાત છે. આ સૈનિકો માત્ર અમેરિકા માટે જ નહીં, પણ NATOની સુરક્ષા માટે પણ ખૂબ જ મહત્વપૂર્ણ છે. જો તેમને હટાવવામાં આવે તો રશિયા સામે પશ્ચિમી દેશોની તાકાત નબળી પડી શકે છે.
ફ્રેડરિક મર્જે અમેરિકા પર કટાક્ષ કર્યો હતો
આ નિવેદન એવા સમયે આવ્યું છે જ્યારે જર્મનીના ચાન્સલર ફ્રેડરિક મર્જે કહ્યું હતું કે ઈરાન સાથેની વાતચીતમાં અમેરિકા નબળું દેખાઈ રહ્યું છે. ત્યારબાદ ટ્રમ્પે જર્મનીની ટીકા કરી અને કહ્યું કે તેણે રશિયા-યુક્રેન યુદ્ધ અને યુરોપની સમસ્યાઓ પર વધુ ધ્યાન આપવું જોઈએ.ટ્રમ્પે જર્મની ઉપરાંત સ્પેન અને ઈટાલીમાંથી પણ સૈનિકો હટાવવાની વાત કરી છે. તેમનું કહેવું છે કે આ દેશો અમેરિકાને પૂરતી મદદ કરી રહ્યા નથી. બીજી તરફ પેન્ટાગોને કહ્યું છે કે તે દરેક સ્થિતિ માટે તૈયાર છે અને રાષ્ટ્રપતિના આદેશનું પાલન કરશે.
સૈનિકો હટાવવા કેમ આસાન નથી?
નિષ્ણાતો માને છે કે જર્મનીમાંથી સૈનિકો હટાવવાનું કામ સરળ નહીં હોય. ત્યાં અમેરિકાના મોટા સૈન્ય મથકો છે, જેમાં યુરોપ અને આફ્રિકા કમાન્ડ સેન્ટરનો સમાવેશ થાય છે. અમેરિકાની બહારની સૌથી મોટી સૈન્ય હોસ્પિટલ પણ ત્યાં જ છે. આટલા મોટા પાયે સૈનિકો, તેમના પરિવારો અને સાધન-સામગ્રીને બીજી જગ્યાએ લઈ જવું ખૂબ જ ખર્ચાળ અને મુશ્કેલ હશે.અમેરિકી સાંસદોએ પણ આ મુદ્દે સાવચેતી દાખવી છે. કેટલાક નેતાઓએ કહ્યું કે આ નિર્ણય પાછળની સંપૂર્ણ વ્યૂહરચના સમજવી જરૂરી છે. આ ઉપરાંત, એક કાયદા મુજબ યુરોપમાં અમેરિકી સૈનિકોની સંખ્યા 76,000 થી ઓછી કરી શકાતી નથી, જ્યાં સુધી તેની સુરક્ષા અસરોનું સંપૂર્ણ મૂલ્યાંકન ન થઈ જાય.
આ પણ વાંચો: Heart of Tobacco Country: ભારત જ નહીં, કેનેડામાં પણ છે એક 'દિલ્હી'.જાણો આ વિદેશી શહેરનો તમાકુ સાથેનો અનોખો સંબંધ
