વ્હાઇટ હાઉસમાં પુનરાગમન કર્યાના ટૂંકા ગાળામાં જ રાષ્ટ્રપતિ ડોનાલ્ડ ટ્રમ્પ માટે મુશ્કેલીઓ વધી રહી હોય તેવું જણાય છે. એક તાજેતરના સર્વેક્ષણમાં ટ્રમ્પની લોકપ્રિયતામાં મોટો ઘટાડો નોંધાયો છે, જે તેમના બીજા કાર્યકાળ માટે ચિંતાનો વિષય બની શકે છે. મધ્ય પૂર્વમાં ઈરાન સાથે વધી રહેલા સૈન્ય સંઘર્ષ અને અમેરિકામાં આસમાને પહોંચેલા પેટ્રોલના ભાવે ટ્રમ્પના એપ્રુવલ રેટિંગને મોટો ફટકો માર્યો છે.
ડોનાલ્ડ ટ્રમ્પનું એપ્રુવલ રેટિંગ ઘટીને માત્ર 36% રહ્યું
રોઇટર્સ/ઇપ્સોસ દ્વારા કરવામાં આવેલા તાજેતરના સર્વેક્ષણ મુજબ, ડોનાલ્ડ ટ્રમ્પનું એપ્રુવલ રેટિંગ ઘટીને માત્ર 36% થઈ ગયું છે. નોંધનીય છે કે માત્ર એક અઠવાડિયા પહેલા આ રેટિંગ 40% હતું, એટલે કે સાત દિવસમાં 4% નો મોટો ઘટાડો થયો છે. આ આંકડો ટ્રમ્પના અત્યાર સુધીના કાર્યકાળનો સૌથી નીચો સ્તર છે. આઘાતજનક વાત એ છે કે આર્થિક મોરચે ટ્રમ્પનું રેટિંગ તેમના પુરોગામી જો બાઇડેનના સૌથી ખરાબ સમયગાળા કરતા પણ નીચે ઉતરી ગયું છે.