વિશ્વભરમાં અમીરો અને કરોડપતિઓ દ્વારા પોતાનો દેશ છોડીને અન્ય દેશોમાં સ્થાયી થવાનો ટ્રેન્ડ ખૂબ જ ઝડપથી વધી રહ્યો છે. 'હેનલી વેલ્થ રિપોર્ટ 2026' અનુસાર, આ વર્ષે દુનિયાભરમાંથી આશરે 1.65 લાખ કરોડપતિઓ વધુ સારી સુવિધાઓ, સુરક્ષિત ભવિષ્ય અને વ્યવસાયિક વાતાવરણની શોધમાં પોતાનો દેશ છોડીને અન્ય દેશોમાં સ્થાયી થવાની તૈયારી કરી રહ્યા છે. આ આંકડો વૈશ્વિક સ્તરે એક નવો રેકોર્ડ સ્થાપિત કરી રહ્યો છે, જે દર્શાવે છે કે હવે માત્ર પૈસા કે લક્ઝરી લાઈફસ્ટાઈલ જ નહીં, પરંતુ સુવિધાઓ અને ભવિષ્યની સુરક્ષા અમીરો માટે પ્રાથમિકતા બની ગઈ છે.
મોટી સંખ્યામાં રઈસો બહાર જઈ રહ્યા છે.
છેલ્લા કેટલાક વર્ષોના આંકડાઓ પર નજર કરીએ તો અમીરોના પલાયનનો આ સિલસિલો સતત વધી રહ્યો છે. વર્ષ 2024માં 1.34 લાખ અને વર્ષ 2025માં 1.42 લાખ કરોડપતિઓએ પોતાનો દેશ છોડ્યો હતો, જે આ વર્ષે વધીને 1.65 લાખે પહોંચવાનો અંદાજ છે. વર્ષ 2013ની સરખામણીએ (જ્યારે આ સંખ્યા માત્ર 51 હજાર હતી) આજના સમયમાં અન્ય દેશોમાં શિફ્ટ થનારા અમીરોની સંખ્યા ત્રણ ગણી કરતાં પણ વધુ વધી ગઈ છે. આ ટ્રેન્ડની સીધી અસર અમેરિકા અને બ્રિટન જેવી મોટી વૈશ્વિક અર્થવ્યવસ્થાઓ પર પણ જોવા મળી રહી છે, જ્યાંથી મોટી સંખ્યામાં રઈસો બહાર જઈ રહ્યા છે.
