અમેરિકામાં વસતા ભારતીયો માટે એક ચિંતાજનક સમાચાર સામે આવ્યા છે. યુએસ સ્ટેટ ડિપાર્ટમેન્ટે વિઝા અંગે એક મહત્વપૂર્ણ ચેતવણી જારી કરી છે, જે મુજબ EB-1 શ્રેણી હેઠળ યુએસ ગ્રીન કાર્ડ મેળવવાનું સ્વપ્ન જોતા ભારતીયોને મોટો આંચકો લાગી શકે છે. ભારત માટેનો EB-1 ક્વોટા યુએસ નાણાકીય વર્ષ પૂર્ણ થાય તે પહેલા જ સમાપ્ત થવાની પૂરી સંભાવના છે.
EB-1 વિઝા શ્રેણી બંધ થવાના આરે
યુએસ સ્ટેટ ડિપાર્ટમેન્ટના સપ્ટેમ્બર વિઝા બુલેટિનમાં જણાવવામાં આવ્યું છે કે ઉચ્ચ માંગ અને વધુ વપરાશના કારણે આગામી અઠવાડિયામાં ભારતીયો માટે EB-1 વિઝા શ્રેણી અસ્થાયી રૂપે અનુપલબ્ધ થઈ શકે છે. આ શ્રેણી ખાસ કરીને અપવાદરૂપ ક્ષમતાઓ ધરાવતા પ્રતિભાશાળી લોકો માટે હોય છે, જેમાં પ્રોફેસરો, ઉચ્ચ સંશોધકો, વિશેષ અધિકારીઓ અથવા બહુરાષ્ટ્રીય કંપનીઓના કુશળ મેનેજરોનો સમાવેશ થાય છે. વિભાગ દ્વારા સ્પષ્ટ કરવામાં આવ્યું છે કે જો આ ક્વોટા ૩૦ સપ્ટેમ્બરની કટ-ઓફ તારીખ પહેલાં પૂર્ણ થઈ જશે, તો રોજગાર-આધારિત આ વિઝા શ્રેણી હાલ પૂરતી બંધ કરી દેવામાં આવશે.
નિયમો અને વાર્ષિક વિઝા મર્યાદા
સ્ટેટ ડિપાર્ટમેન્ટની વેબસાઇટ પર ઉપલબ્ધ આંકડાઓ અનુસાર, નાણાકીય વર્ષ ૨૦૨૬ માટે ઇમિગ્રેશન અને રાષ્ટ્રીયતા અધિનિયમ (INA) ની કલમ ૨૦૧ હેઠળ વૈશ્વિક સ્તરે રોજગાર-આધારિત પસંદગી મર્યાદા ૧,૮૬,૩૧૭ નિર્ધારિત કરવામાં આવી છે. નિયમો અનુસાર પ્રતિ દેશ મર્યાદા કુલ વાર્ષિક રોજગાર મર્યાદાના ૭ ટકા નક્કી કરવામાં આવી છે, જે આંકડાકીય રીતે ૨૮,૮૬૨ થાય છે.
ભારત જેવા દેશોમાંથી આ શ્રેણી માટે અરજી કરનારાઓની સંખ્યા ખૂબ જ વધારે હોવાને કારણે નિર્ધારિત મર્યાદા ઝડપથી પૂરી થઈ જાય છે. સ્ટેટ ડિપાર્ટમેન્ટ આ સમગ્ર પરિસ્થિતિ પર સતત નજર રાખી રહ્યું છે અને જરૂરિયાત મુજબ યોગ્ય પગલાં લેવામાં આવશે તેમ જણાવ્યું છે, પરંતુ હાલની સ્થિતિ જોતા હજારો વ્યાવસાયિકોની અનિશ્ચિતતા વધી ગઈ છે.
પ્રભાવિત વ્યાવસાયિકો અને ભવિષ્યની અનિશ્ચિતતા
યુએસમાં લાંબા સમયથી કાયદેસરના કાયમી નિવાસ (ગ્રીન કાર્ડ) ની રાહ જોઈ રહેલા ઉચ્ચ લાયકાત ધરાવતા ભારતીયો માટે આ સ્થિતિ ભારે તણાવપૂર્ણ બની છે. EB-1 જેવી પ્રીમિયમ શ્રેણી પણ સમયપૂર્વે બંધ થવાના આરે હોવાથી ટેકનોલોજી, શિક્ષણ અને કોર્પોરેટ ક્ષેત્રે કામ કરતા પ્રોફેશનલ્સના કરિયર અને ભવિષ્ય પર પ્રશ્નાર્થ ચિહ્ન લાગી ગયું છે. સંબંધિત વ્યાવસાયિકો અને તેમના પરિવારો હવે યુએસ સરકાર તરફથી કોઈ રાહતરૂપ જાહેરાત કે નવા બુલેટિનની આશા રાખી રહ્યા છે.
આ પણ વાંચોઃ Donald Trump: ઓઇલ સાવ સસ્તું થઇ જશે! ડોનાલ્ડ ટ્રમ્પના આ દાવાએ લોકોને ચોંકાવી દીધા
