અમેરિકાએ પરમાણુ સુરક્ષાની દિશામાં એક મોટી સફળતા હાંસલ કરી છે. લાંબા સમયથી ઈરાનના સંવર્ધિત યુરેનિયમ પર નજર રાખનાર અમેરિકાએ હવે વેનેઝુએલામાંથી 13.5 કિલો હાઈલી એનરિચ્ડ યુરેનિયમ (Uranium) હટાવીને પોતાના કબજે લીધું છે. રાષ્ટ્રપતિ ડોનાલ્ડ ટ્રમ્પના નેતૃત્વમાં આ ઓપરેશન અમેરિકા, બ્રિટન અને વેનેઝુએલાના સંયુક્ત પ્રયાસોથી પૂર્ણ કરવામાં આવ્યું છે.

દક્ષિણ કેરોલિનામાં થશે પ્રોસેસિંગ

અમેરિકી ઉર્જા વિભાગના જણાવ્યા અનુસાર, આ યુરેનિયમ વેનેઝુએલાની રાજધાની કરાકાસ પાસે આવેલા એક જૂના રિસર્ચ રિએક્ટરમાં રાખવામાં આવ્યું હતું. આ ઓપરેશન અત્યંત જટિલ હતું, જેમાં જમીન અને સમુદ્રી માર્ગે યુરેનિયમને સુરક્ષિત રીતે અમેરિકાના સાઉથ કેરોલિના સ્થિત પરમાણુ કેન્દ્રમાં પહોંચાડવામાં આવ્યું છે. હવે અમેરિકા પોતે આ યુરેનિયમને પ્રોસેસ કરશે.

બદલાતા રાજકીય સમીકરણો

એક સમય એવો હતો જ્યારે ટ્રમ્પ પ્રશાસન અને વેનેઝુએલા વચ્ચે ભારે તણાવ હતો, પરંતુ તાજેતરમાં બંને દેશોના સંબંધોમાં મોટો સુધારો જોવા મળ્યો છે. CIA ડાયરેક્ટર સહિત અનેક ઉચ્ચ અધિકારીઓની મુલાકાત બાદ બંને દેશો વચ્ચે સાત વર્ષ પછી સીધી કોમર્શિયલ ફ્લાઈટ શરૂ થઈ છે અને અમેરિકાએ વેનેઝુએલામાં પોતાનું દૂતાવાસ પણ ફરી ખોલી દીધું છે.

નેશનલ ન્યુક્લિયર સિક્યોરિટી એડમિનિસ્ટ્રેશનના પ્રમુખ બ્રાન્ડન વિલિયમ્સે જણાવ્યું હતું કે, વેનેઝુએલામાંથી યુરેનિયમ હટાવવું એ સંકેત આપે છે કે દેશ હવે વિકાસના એક નવા યુગમાં પ્રવેશી રહ્યો છે અને આ સમગ્ર વિશ્વની સુરક્ષા માટે સારા સમાચાર છે.


આ પણ વાંચૌો:SriLanka: શ્રીલંકામાં ખળભળાટ,સગીરાના યૌન શોષણના કેસમાં 71 વર્ષીય મુખ્ય બૌદ્ધ ભિક્ષુની ધરપકડ